काठमाडौं, १४ साउन । संसदीय छानविन विशेष समितिले सहकारी ठगीको आरोप लागेर विदेशमा रहेका जीबी राईसहित १८ जनालाई तत्काल नेपाल झिकाउन र थुनामा रहेकाहरुसँग समेत बयानको वातावरण बनाउन सरकारलाई निर्देशन दिएको छ ।

सूर्य दर्शन, स्वर्ण लक्ष्मी बचत तथा ऋण सहकारी संस्था लगायतका जीबी राईसहित १८ जनालाई झिकाउन सरकारलाई निर्देशन दिएको हो ।
सहकारीको रकम ठगी गरेर फरार रहेका सूर्य दर्शन सहकारीका जीबी राई, भुपेन्द्र राई, ज्ञानबहादुर बम्जन र थानबहादुर बुढामगर, सुमेरू सहकारीका भरत महर्जन, राजमाया महर्जन, सचिन महर्जन र सरला महर्जन छन् ।

यस्तै शिव शिखर सहकारीका तेजबहादुर बम्जन, इमेज वचत सहकारीका देवकुमार नेपाली, दीपक पौडेल र छेदा नेपाली, सानोपाइला सहकारीका तस्बिरन खातुन र असरफ अलि, सहारा सहकारीका सुवास केसी, शिव शिखर सहकारीका लीलानाथ गौतम, मेघा ड्रिम सहकारीका महाशंकर रेग्मी र कान्तिपुर कोअपरेटिभका प्रेमध्वज लामालाई नेपाल झिकाउन समितिले निर्देशन दिएको छ ।

सोमबार सिंहदरबारमा गृहमन्त्री रमेश लेखकसहित गृहसचिव, प्रहरी प्रमुख लगायतसँग छलफल गर्दै समितिले यस्तो निर्देशन दिएको हो । समितिले सहकारी ठगीमा संलग्न १८ जना देशबाहिर रहेको पाइएको भन्दै बैठकमा विवरण नै प्रस्तुत गरेको थियो ।