पोखरा, १२ असार । प्राइम बहुउद्देश्यीय सहकारी ठगी मुद्दामा संलग्न अधिवक्ता ईन्द्रप्रसाद बराल १२ लाख धरौंटीमा जिल्ला अदालत कास्कीबाट रिहा भएका छन् । न्यायाधीश रामचन्द्र शर्माको एकल ईजलासले अधिवक्ता बराललाई धरौंटीमा छाड्ने आदेश दिएको हो ।

प्राइम सहकारीका कानुनी सल्लाहकार रहेका अधिवक्ता बरालले सहकारीबाट झण्डैं ५३ लाख रुपैयाँ भन्दा बढि रकम ठगी गरेको वित्तीय छानबिन प्रतिवेदन र प्रहरी अनुसन्धान प्रतिवेदनबाट खुलेको थियो ।

पोखरा महानगरपालिका वडा नं. १३ आर्वा स्थायी ठेगाना भई हाल पोखरा–१२ ढिकालेथर बस्दै आएका अधिवक्ता बराललाई प्रहरीले जेठ १ गते पक्राउ गरेको थियो । उच्च अदालत पोखरामा उनकी छोरी कुशुम बरालले दिएको बन्दीप्रत्यक्षीकरणको रिटमा अधिवक्ता बराल जेठ ८ गते थुनामुक्त भएका थिए । थुनामुक्त भएसँगैं बराल फरार भएका थिए ।

उच्च अदालत पोखराले कानुन व्यवसायी भन्दैं थुनामा नबसी मुद्दामा सहयोग गर्न दिएको छुटको दुरुपयोग गर्दै फरार भएपछि अधिवक्ता बराललाई प्रहरीले दिनभरि नैं हतकडी लगाएर अदालतमा उपस्थित गराएको थियो ।

फरार भएका अधिवक्ता बराल आइतबार आफैं अदालतमा उपस्थित भएका थिए । आइतबार अदालतमा हाजिर भए पनि थुनछेक बहस नसकिएकाले १ रात थुनामा रहेका बराल सोमबार धरौंटी बुझाएर रिहा भएका छन् ।

उनीसँगै पक्राउ परेका मुख्य योजनाकार प्रमुख कार्यकारी अधिकृत सुरेन्द्रमणि पौडेल र व्यवस्थापक निरु थापासहित ७ जना गत विहीबार नै पुर्पक्षका लागि थुनामा गएका छन् । कास्की जिल्ला अदालतका न्यायाधीश रामचन्द्र शर्माको इजलासले उनीहरुलाई पुर्पक्षका लागि थुनामा पठाउने आदेश दिएको हो । तीन दिनसम्मको थुनछेक बहसपछि बिहीबार मात्र यस्तो आदेश आएको थियो ।

६५ जना प्रतिवादी रहेको उक्त मुद्दामा अदालतमा उपस्थित ९ मध्ये बाँकी २ जना धरौटीमा रिहा भए । सेयर सदस्य एवं सल्लाहकार मानबहादुर गुरुङलाई ३५ लाख र राष्ट्रिय सहकारी बैंक पोखराका तत्कालिन प्रबन्धक सन्तोष घिमिरेलाई १ लाख धरौटीमा रिहा गर्ने आदेश दिएको हो । घिमिरे भने मित्र मिलन सहकारी ठगी मुद्दामा कारागारमै छन् ।

सहकारीका निवर्तमान अध्यक्ष निदेशप्रसाद कोइराला, अध्यक्ष शंकर कार्की, पूर्व कोषाध्यक्ष कुलदीप भट्टराई, कर्जा अधिकृत सुनिल थापा र सुकुमबासी समितिका उत्तम मगर पनि पुर्पक्षका लागि थुनामा छन् ।

जिल्ला सहकारी वकिलको कार्यालयले उक्त सहकारी ठगीमा बलराम चापागाईं समेतको जाहेरीले सुरेन्द्रमणि पौडेलसमेत ६५ जनालाई प्रतिवादी बनाएर ८ देखि १० वर्षसम्म कैद सजाय तथा १ अर्ब ५७ करोड १५ लाख ८ हजार १ सय २४ रुपैयाँ बिगो रकम माग दाबीसहित अदालतमा अभियोगपत्र दायर गरेको थियो ।

उच्च अदालतको आदेश अवज्ञा गर्दै फरार भएका अधिवक्ता बरालको हातमा हतकडी:
उच्च अदालत पोखराले कानुन व्यवसायी भएको नाताले प्रहरी हिरासतमा नबसी मुद्दाको अनुसन्धानमा प्रहरीलाई सहयोग गर्न भन्दैं अधिवक्ता बराललाई थुनामुक्त गरिदिएको थियो । तर अधिवक्ता बरालले उच्च अदालतले दिएको सुविधाको दुरुपयोग गर्दै प्रहरीलाई सहयोग गर्नुको सोटो मोवाईल स्वीचअफ गरेर फरार भएका थिए । प्रहरीले खोजतलास गर्दा कहीं नभेटिएका अधिवक्ता बराल आइतबार आफैं अदालतमा उपस्थित भएका थिए । आइतबार थुनछेक बहसका क्रममा बयान लिने काम नसकिएपछि प्रहरीले बराललाई हतकडी लगाएर नै जिप्रका थुनामा राखेको थियो । भोलिपल्ट पनि अन्य कैदीसरह नै अधिवक्ता बराललाई प्रहरीले हतकडी लगाएर जिल्ला अदालत कास्कीमा उपस्थित गराएको थियो । साथै, प्रहरीले बयान लिने क्रममा अदालत भित्र जाँदा पनि अधिवक्ता बराललाई हतकडी नै लगाएर लैजाने र ल्याउने गरेको थियो । यो दृश्य देखिरहेका सहकारी पीडित बचतकर्ताहरुले भने खुशी व्यक्त गरेका छन् ।

कानुन सबैका लागि समान हो, तर पोखरामा कानुन व्यवसायीहरुलाई भने विशेष प्रकारको छुट अदालतले दिदैं आईरहेको थियो । यसपटक लगातार ठगीमा कानुन व्यवसायीहरु पक्राउ पर्ने क्रम चलिरहँदा बराललाई भने प्रहरीले कडाई गरेको छ । त्यसो त यस्ता ठगी र अपराधमा संलग्न कानुन व्यवसायीहरुलाई बचाउन झुण्ड बनाएर ईजलास नै घेर्ने कानुन व्यवसायीहरुले अब भने पाठ सिक्न जरुरी भएको  छ । पैसा र पेशाका नाममा यस्तो ठगीमा संलग्नहरुलाई जोगाउन न्यायाधीश र अदालतलाई गुमराहमा राख्ने प्रवृत्तिको अन्त्य आवश्यक भईसकेको छ ।