बुटवल, ७ वैशाख । जिल्ला अदालत रूपन्देहीले सुप्रिम बचत तथा ऋण सहकारी ठगी प्रकरणमा पक्राउ परेका सात जनामध्ये अध्यक्ष ओमप्रकाश गुरुङलाई मात्र पुर्पक्षका लागि थुनामा पठाउन आदेश दिएको छ ।

आज शुक्रबार जिल्ला अदालतका न्यायाधीश श्रीप्रकाश उप्रेतीको इजलासले सहकारीका अध्यक्ष गुरुङलाई पुर्पक्षको लागि थुनामा पठाउन आदेश दिएको हो ।

सर्वसाधारणको ९६ करोड भन्दा बढी रकम ठगी गरेको अभियोगमा पक्राउ परेका पूर्वसचिव दिपेश पुन, दुर्गा चापागाईं पाण्डेय, दीपक न्यौपने, नवीन अछामी, नीता थापामगर र रोशनी गुरूङलाई धरौटीमा छाड्न आदेश दिएको सूचना अधिकारी अनन्तराम मरासिनीले जानकारी दिएका छन् ।

सूचना अधिकारी मरासिनीका अनुसार पूर्वउपराष्ट्रपति नन्दबहादुर पुनका छोरा दिपेश पुनलाई जम्मा ४ लाख रुपैयाँ धरौटीमा छाड्ने आदेश दिएको हो ।

दुर्गा चापागाईं पाण्डेयसँग १८ लाख, नवीन अछामीसँग १० लाख, दीपक न्यौपानेसँग ४ लाख ४५ हजार, नीता थापा मगरसँग २ लाख र रोशनी गुरुङसँग २ लाख रुपैयाँ धरौटी माग गरिएको छ ।

त्यसैगरी सूर्यदर्शन सहकारी ठगीमा पुर्पक्षका लागि कास्की कारागारमा रहेका ग्यालेकसी टेलिभिजनका सञ्चालक कुमार रम्तेल र भविश्वर अर्याललाई पनि अदालतले झिकाउने आदेश भएको सूचना अधिकारी मरासिनीले जानकारी दिए ।

सहकारी ठगी प्रकरणमा जिल्ला सरकारी वकिल कार्यालयले गत शुक्रबार २८ जनाविरूद्ध मुद्दा दायर गरेको थियो । जसमध्ये थुनछेक बहसका क्रममा ७ जना उपस्थित थिए । अदालतमा उपस्थित नभएका प्रतिवादीहरूका नाममा भने म्याद जारी गरिएको छ ।

एक हजार ८३१ बचतकर्ताको ९६ करोड भन्दा बढी रकम हिनामिना गरेको भन्दै सहकारीका सञ्चालक र कर्मचारीविरूद्ध पीडितहरुले प्रहरीमा जाहेरी दिएका थिए ।