पोखरा, १८ चैत । कास्कीको अन्नपूर्ण गाउँपालिका वडा नं. ४ सल्लाघारीमा आज दिउँसो भएको जीप दुर्घटनामा परी दुईजनाको मृत्यु भएको छ भने १० जना घाईते भएका छन् । दुर्घटनामा परी मृत्यु हुनेमा पोखरा–२३ कार्कीतगराका ५५ वर्षीय लक्ष्मण सुनार र सोही वडाका ५२ वर्षीय जयराम सुनार रहेका छन् ।

मणिपाल शिक्षण अस्पतालमा उपचारका क्रममा लक्ष्मणको र चेकजाँचका क्रममा जयरामलाई डाक्टरले मृत घोषणा गरेको जिल्ला प्रहरी कार्यालय कास्कीले जानकारी दिएको छ । घाईतेहरुको पश्चिम क्षेत्रीय अस्पताल र मणिपाल शिक्षण अस्पतालमा उपचार भईरहेको छ ।

आइतबार आज दिउँसो ३ः३० बजेको समयमा पोखराबाट भदौंरे सल्यानतर्फ जाँदैं गरेको ग १ ज ५५४७ नम्बरको बोलेरो जीप अचानक सडकबाट २५० मिटर तल खसेको थियो । जिप खसेर घाईते हुनेहरुमा जीप चालक अन्नपूर्ण गाउँपालिका वडा नं. ४ का २२ वर्षीय धनराज सुनार (मध्यम), पोखरा–२३ का ५८ वर्षीय लक्ष्मण कामी (मध्यम), सोही ठाउँ बस्ने ७ वर्षीय आरुष विक (मध्यम), सोही ठाउँ बस्ने ४१ वर्षीय राजकुमार विक (मध्यम)को पश्चिम क्षेत्रीय अस्पतालमा उपचार भईरहेको छ ।

त्यसैगरी, अन्नपूर्ण गाउँपालिका वडा नं. ५ सल्यानका ३५ वर्षीय प्रकाश सुनार, सोही ठाउँ बस्नेहरु ३५ वर्षीय सुशिला सुनार, १५ वर्षीय सोनिशा सुनार, २२ महिनाको बालक सुप्रिम सुनार (बाहिरी चोट नभएको, अवस्था सामान्य), ६० वर्षीय रामप्रसाद सुनार (मध्यम) र अन्नपूर्ण गाउँपालिका वडा नं. ४ का ५० वर्षीय देउमाया केसी (मध्यम)को मणिपाल शिक्षण अस्पतालमा उपचार भईरहेको छ ।