पोखरा, १६ चैत । समाचार लेखेको विषयमा पत्रकार फणिन्द्र अधिकारी र उनको परिवारलाई धम्की दिइएको भन्दैं डा. बाबुराम भट्टराई नेतृत्वको नेपाल समाजवादी पार्टीको गण्डकी प्रदेश सदस्य समेत रहेका रेष्टुरेण्ट व्यवसायी मेखबहादुर क्षेत्री (राजु)लाई कारवाही गर्न प्रेस सेन्टर नेपाल गण्डकी प्रदेश समिति र जिल्ला समिति कास्कीले माग गरेको छ ।

प्रेस सेन्टर नेपाल गण्डकी प्रदेश समितिका महासचिव सन्तोष गौतम र जिल्ला समिति कास्कीका सचिव पुष्प दाहालले छुट्टा–छुट्टैं प्रेस विज्ञप्ति जारी गर्दै भयरहित वातावरणमा स्वतन्त्रतापूर्वक पत्रकारिता पेशा गर्न पाउने अवस्थाको र्सिजना गराउन सम्बन्धित पक्षसँग माग गरेका छन् ।

गोरखापत्र राष्ट्रिय दैनिक पत्रिकाका लेखनाथ समाचारदाता र नेपाल दूत डटकमका प्रधान सम्पादक फणिन्द्र अकिञ्चनले पोखरा महानगरपालिका वडा नं. २२ पुम्दीभुम्दीस्थित वन अतिक्रमण गर्ने २२ जना विरुद्ध डिभिजन वन कार्यालय कास्कीले चैत १३ गते कास्की जिल्ला अदालतमा दायर गरेको मुद्दाका विषयमा समाचार लेखेका थिए ।

सोही समाचारको विषयलाई लिएर यहीं चैत १६ गते मुद्दाका मुख्य आरोपी मेखबहादुर क्षेत्री (राजु)ले पत्रकार फणिन्द्र र उनको परिवारका सदस्यलाई फोन र म्यासेज गरेर धम्क्याएका थिए । अदालतमा सरकारी निकायले मुद्दा दर्ता गरेको विषयमा समाचार लेख्ने पत्रकारलाई धम्की दिनु दुःखद र आपत्तिजनक भएको विज्ञप्तिमा उल्लेख गरिएको छ ।

समाचारका विषयमा चित्त नबुझे प्रेस काउन्सिल नेपाल लगायत नियमनकारी निकायमा उजुरी गरेर कानुनी उपचार खोज्न पाउने व्यवस्था हुँदाहुँदैं पत्रकारलाई धम्काईएको भन्दैं प्रेस सेन्टर नेपालले आपत्ति जनाएको छ ।

धम्की दिने पूर्वमाओवादी राजु क्षेत्रीले पोखरा–२२ को कित्ता नम्बर १२६२ को राष्ट्रिय वन क्षेत्रमा १७२ वर्ग मिटर क्षेत्रफलको जग्गामा विगत १२ वर्षदेखि गैरकानुनी रुपमा इलाईट क्याफे सञ्चालन गर्दै आईरहेका थिए । अदालतमा दायर भएको मुद्दामा एक लाख जरिवाना र हदैसम्मको कैद सजायको माग गरिएको छ ।

साथै राष्ट्रिय वन क्षेत्रको जग्गामा अतिक्रमण गरी राजु क्षेत्रीले निर्माण एवम् सञ्चालन गरेको इलाईट क्याफे रहेको भवन जफत गर्नुका साथै उक्त क्षेत्रलाई राष्ट्रिय वन क्षेत्र कायम गर्न माग गरिएको छ । वन ऐन २०७६ र नियमावली २०७९ अनुसार २२ जना अभियुक्तहरुलाई सजायको माग दावी गर्दै डिभिजन वन कार्यालय कास्कीका वन अधिकृत माधुरी खड्काले अभियोग पत्र अदालतमा यहीं चैत १३ गते दर्ता गराएकी थिईन् ।