पोखरा, १५ फागुन । सूर्यदर्शन सहकारी ठगीको अभियोगमा पुर्पक्षका लागि थुनामा रहेका राष्ट्रिय युवा संघका केन्द्रीय नेता शिवबहादुर गुरुङ ‘महेन्द्र भोटे’ लगायतले दायर गरेको पुनरावलोकनमा उच्च अदालत पोखराले जिल्ला अदालत कैं आदेश सदर गरेको छ ।

सहकारी ठगीको अभियोगमा कारागारमा रहेका सूर्यदर्शन सहकारीका कोषाध्यक्ष कुमार रम्तेल, उपाध्यक्ष कैलाशकुमार दर्लामी र सञ्चालक समितिका पूर्वसदस्य महेन्द्र भोटेले जिल्ला अदालत कास्कीको आदेश बदरको माग गर्दै उच्चमा पुनरावलोकनको निवेदन दिएका थिए ।

पुनरावलोकनको निवेदनमाथि सुनुवाई गर्दै उच्च अदालतका न्यायाधीशद्वय मिलन राई र उमेश कोइरालाको संयुक्त इजलासले जिल्लाको आदेश सदर गर्ने फैसला गरेका हुन् ।

सहकारी ठगीमा संलग्न राष्ट्रिय युवा संघ नेपालका उपमहासचिव महेन्द्र भोटेलाई कारागार लैजाँदैं प्रहरी ।

सहकारी ठगीमा फरार रहेका गितेन्द्र बहादुर राई(जीवी) का मुख्य सहयोगी रम्तेललाई अदालतले असोज २१ गते पुर्पक्षका लागि थुनामा पठाउन आदेश दिएको थियो । फरार रहेका दर्लामीलाई १२ पुसमा र भोटेलाई पुस १८ गते पुर्पक्षका लागि थुनामा गएका थिए ।

१८ हजार बचतकर्ताको डेढ अर्ब बढी रकम ठगी गरेको अभियोगमा १९ जना प्रतिवादी बनेका थिए । अधिकांश प्रतिवादीहरू अझैँ फरार छन् । पछिल्लो समय सहकारी ठगीबारे बचतकर्ताहरूले दिएको पूरक अभियोग पत्रका आधारमा रवि लामिछानेसहितमाथि प्रहरीले अनुसन्धान गरिरहेको छ ।