पोखरा, २८ मंसिर । मणिपाल अस्पतालबाट भागेका विरामी सेती नदीमा हामफालेपछि खोजीका लागि आज दिउँसो सेती नदीको बाँध खोलिने भएको छ । तनहुँ स्थायी घर भई हाल पोखरा–१६ लामाचौर बस्दै आएका १९ वर्षीय संगम मिश्र सेती नदीमा हामफालेका थिए ।

३ दिनदेखि वेपत्ता भएका मिश्रको खोजीका लागि प्रहरीले आज दिउँसो १२ बजेदेखि ४ बजेसम्म पोखरा–१६ दिपस्थित रहेको ड्याम खोल्ने भएको छ । जिल्ला प्रहरी कार्यालय कास्कीले एक सूचना जारी गर्दै उक्त समयमा सेती नदीमा पानीको बहाव बढ्न सक्ने हुँदा उक्त समयमा नदी वरिपरि काम गर्ने तथा आवतजावत गर्ने मानिसहरु चनाखो भई कार्य गर्नु हुन अनुरोध गरिएको छ । सूचनामा भनिएको छ, ‘नदीको किनारमा नआउनु हुन र सुरक्षा सतर्कता अपनाउनु हुन सबैको लागि यो सूचना प्रकाशन गरिएको छ ।’

मिश्र बिरामी भएपछि उपचारका लागि बुबासँगैं मणिपाल शिक्षण अस्पताल गएका थिए । बुवा औषधि लिन बाहिर गएको बेला इमर्जेन्सी वार्डबाटै उनी सम्पर्कविहीन भएको प्रहरीले जनाएको छ । खोजतलास गर्दा मणिपाल नजिकैको सेती नदीमाथि रहेको झोलुंगे पुल परिसरमा उनले लगाएको कपडा र परिचय पत्र भेटिएकाले नदीको बाँध खोल्न लागिएको जिल्ला प्रहरी कार्यालय, कास्कीका सूचना अधिकारी डीएसपी श्रवणकुमार विकले जानकारी दिए ।