पर्वत, १७ मंसिर । पर्वत जिल्लामा पनि सहकारी सञ्चालकहरुको आर्थिक वेथिति उदाङ्गिएको छ । तपाई हाम्रो बहुउद्देश्यीय बचत तथा ऋण सहकारी संस्था र ग्रामीण विकास कृषि सहकारी संस्थाका सञ्चालकहरु पक्राउ परेसँगैं सहकारी भित्रको वेथिति बाहिरिएको हो ।

बचतकर्ताको उजुरी पश्चात् जिल्ला प्रहरी कार्यालय पर्वतले ठगीको आरोपमा दुई सहकारीका आठजनालाई पक्राउ गरिसकेको छ । साथै सहकारी रजिष्ट्रारको कार्यालय पोखराले विज्ञ टोली नै खटाएर दुई सहकारीको आर्थिक गतिविधिको पुरै छानबिन गरिरहेको जिप्रका पर्वतका प्रमुख डीएसपी खुमलाल भुसालले जानकारी दिए ।

पर्वत जिल्लाको सदरकुमाम कुश्मा बजारमा सञ्चालित तपाई हाम्रो बहुउद्देश्यीय सहकारीका ३ जना र ग्रामीण विकास कृषि सहकारीका ५ जना पक्राउ परेका हुन् । पक्राउ परेकाहरुलाई सहकारी ऐन २०७४ बमोजिम सहकारी ठगी गरेको कसुरमा अनुसन्धान अघि बढाईएको डीएसपी भुसालले बताए ।

प्रहरीका अनुसार पक्राउ पर्नेहरुमा तपाईँ हाम्रो बहुउद्देश्यीय सहकारी संस्थाका उपाध्यक्ष कृष्णप्रसाद उपाध्याय, सचिव विकास विश्वकर्मा र सहसचिव ओमकार कर्माचार्य रहेका छन् । त्यसैगरी ग्रामीण विकास कृषि सहकारी संस्थाका अध्यक्ष लेखनाथ शर्मा, उपाध्यक्ष विष्णु तिवारी, पूर्व अध्यक्ष राजु शर्मा र सल्लाहकार शालिग्राम शर्मा तथा ऋण समिति संयोजक धनपति आचार्य पक्राउ परेका हुन् । फरार रहेका अन्य सञ्चालकहरुको व्यापक खोजीकार्य भएको प्रहरीले जानकारी दिएको छ ।

प्रहरीले मंसीर १३ गते सामाजिक सञ्जालमार्फत् सूचना सार्वजनिक गर्दै दुवै सहकारीका बचतकर्तालाई सहकारीमा रकम जम्मा गरेको आधार देखिने पासबुक, भौचर, स्टेटमेन्ट मुद्दति प्रमाणपत्र लगायतका सक्कल कागजातसहित प्रहरी कार्यालयमा आउन आह्वान गरिसकेको छ ।