पोखरा, २९ कार्तिक । लागुऔषध प्रयोगकर्ता २२ वर्षीय रविन क्षेत्रीले आफ्नै बुबालाई खुर्पा प्रहार गरी हत्या गरेका छन् । डिप्रेशनको औषधी समेत सेवन गर्दै आईरहेका रविनले हिजो मंगलबार मध्यरातमा बुबासँग भएको सामान्य विवादका क्रममा खुर्पा प्रहार गरेका थिए । खुर्पा प्रहार गरी घाईते भएका बुबाको उपचारका क्रममा आज विहान मृत्यु भएको हो ।

पोखरा–१७, बिरौंटास्थित आफ्नै निवासमा छोरा रविनले ५२ बर्षीय बुबा रामु क्षेत्रीलाई खुर्पा प्रहार गरी घाईते बनाएर भागेका थिए । तत्कालै छिमेकीले प्रहरीलाई खबर गरिदिएपछि घाईते भएका बुबाको चरक मेमोरियल अस्पतालमा उपचारका लागि लगिएको थियो । उपचारका क्रममा आज बुधबार विहान ५ बजे बुबा रामुको मृत्यु भएको जिल्ला प्रहरी कार्यालय कास्कीले जानकारी दिएको छ ।

बुबालाई घाईते बनाएर घरबाट भागेका रविनलाई कास्की प्रहरीले खोजतलासका क्रममा ४ घण्टापछि नैं पाल्पाबाट ग २० प ६०४७ नम्बरको मोटरसाईकलसहित पक्राउ गर्न सफल भएको थियो । यतिबेला रबिनका बुबाको शव पोष्टमार्टमका लागि पश्चिमाञ्चल क्षेत्रीय अस्पताल गण्डकीमा राखिएको छ ।

श्रीमान्को हत्या भएपछि रविनकी आमा वेहोस अवस्थामा रहेकी र जापानमा रहेकी दिदी यो घटनाबाट विक्षिप्त बनेको छिमेकीहरुले बताएका छन् । एक छोरा, एक छोरी रहेको त्यो परिवारमा लागूऔषध प्रयोग कैं कारण यो दुःखद घटना घटेको छिमेकीहरुको भनाई छ ।

जिल्ला प्रहरी कार्यालय कास्कीका प्रवक्ता डीएसपी श्रवणकुमार विकले प्रारम्भिक अनुसन्धान बल्ल शुरु भएको र हत्याको कारण अझै खुलिनसकेको बताए । बुबाको हत्या गरेका रविनमाथि प्रहरीले कर्तव्य ज्यान सम्बन्धी मुद्दामा अनुसन्धान प्रक्रिया अगाडि बढाएको छ ।