‘यतिबेला अध्यक्ष रमणले को-कोले पैसा लगेका छन्, कहाँ-कहाँ पैसा फसेको छ र कस-कसले ऋण नतिरिकन पनि कागजपत्र मिलाएका छन्, सबैको बारेमा खुलासा गर्दै थिए । तर प्रहरीले पक्राउ गरेछ, अब त झन् सहकारीको सफट्वेयरको पासवर्ड उपाध्यक्ष लम्सालले पाए भने त झनैं सहकारीको सम्पत्ति हिनामिना गर्ने भए ।’- जिप्रका अगाडि जम्मा भएका पीडित बचतकर्ताहरु

पोखरा, ५ कार्तिक । मित्र मिलन बचत तथा ऋण सहकारी लिमिटेड पोखरा–९, नयाँबजारका अध्यक्ष रमण पौडेल र प्रमुख कार्यकारी अधिकृत किरण अधिकारीलाई जिल्ला प्रहरी कार्यालय कास्कीले पक्राउ गरेको छ । जिल्ला प्रहरी कार्यालय कास्कीका प्रवक्ता डीएसपी श्रवण कुमार विकले बचतकर्ताको उजुरीका आधारमा अध्यक्ष पौडेल र निर्देशक अधिकारीलाई हिजो पक्राउ गरिएको जानकारी दिए । डीएसपी विकले भने–‘सहकारीको बचतकर्तालाई दिइएको चेक बाउन्स भएपछि उनीहरुलाई हिजो दिउँसो पक्राउ गरिएको हो ।’

बचतकर्ता सरस्वती सिग्देलले १३ लाख रुपैयाँको चेक नसाटिएपछि प्रहरीमा जाहेरी दिएकी थिईन् । अध्यक्ष पौडेल पक्राउ परेसँगैं सहकारीका बचतकर्ताहरु झनैं डराएका छन् । उपाध्यक्ष विजय लम्सालको समूहले सहकारीको सम्पत्ति धमाधम व्यक्तिका नाममा कानुन विपरित बेच्ने, ऋण नै नतिरेका व्यक्तिलाई तिरेको भनेर कागजपत्र बनाईदिने लगायतका धन्दाहरु गरेको भेटेपछि बचतकर्ताहरु आत्तिएका हुन् ।

सहकारीका एक बचतकर्ताले जिल्ला प्रहरी कार्यालय कास्कीको गेट अगाडि डन न्यूजसँग भने–‘यतिबेला अध्यक्ष रमणले को कोले पैसा लगेका छन्, कहाँ कहाँ पैसा फसेको छ र कसकसले ऋण नतिरिकन पनि कागजपत्र मिलाएका छन्, सबैको बारेमा खुलासा गर्दै थिए । तर प्रहरीले पक्राउ गरेछ, अब त झन् सहकारीको सफट्वेयरको पासवर्ड उपाध्यक्ष लम्सालले पाए भने त झनैं सहकारीको सम्पत्ति हिनामिना गर्ने भए ।’

पोखरा महानगरपालिका वडा नं. ९ को नयाँबजारमा रहेको मित्र मिलन बचत तथा ऋण सहकारी संस्था लिमिटेडको कार्यालय ।।