पोखरा, १३ असोज । बागलुङबाट पोखरा आउँदै गरेको जिप खोलाले बगाउँदा तीनजना यात्रु वेपत्ता भएका छन् । आज शनिबार साँझ ७ बजेतिर पर्वतको कुश्मा नगरपालिका–७ मा तमादी खोलाको बाढीले यात्रुवाहक जिप बगाएको हो ।

पर्वत प्रहरी प्रमुख डिएसपी खुमलाल भुषालका अनुसार बागलुङबाट पोखरा आउँदैं गरेको ग १ च ६२१३ नम्बरको जिप खोलामा फसेको थियो । जिप फसेपछि चालक झरेर टायरमा ओट लगाउन खोज्दा बाढीले जिप बगाएको हो । जिपमा सवार ३ जनाको खोजी कार्य जारी रहेको छ ।

जिपमा एक जना यात्रु बागलुङबाटै चढेका थिए भने बाँकी दुई जना बिच बाटोबाट चढेका थिए । जिप मैं रहेका यात्रु वेपत्ता भएपछि चालकलाई भने प्रहरीले नियन्त्रणमा लिएको छ । जिप भने तमादी खोला र मोदी खोलाको दोभानमा भेटिएको थियो । जिपमा सवार यात्रुको भने परिचय खुल्न सकेको छैन ।