पोखरा, २५ भदौं । नेपाल आयल निगमको गण्डकी प्रादेशिक कार्यालय गगनगौंडा डिपो पोखराका डिजेल चोरी घटनाका मुख्य अभियुक्त तत्कालिन डिपोप्रमुख चितरञ्जन दास विरुद्ध जिल्ला अदालत कास्कीले आज पक्राउ पुर्जी जारी गरेको छ भने अन्य तीनजनालाई धरौंटीमा आइतबार नैं रिहा गरेको छ ।

मुख्य अभियुक्त दास फरार रहेकाले उनको नाममा ३५ दिनभित्र अदालतमा हाजिर गराउने गरी पक्राउ पुर्जी जारी भएको जिल्ला अदालतका शाखा अधिकृत दुर्गाप्रसाद रिजालले जानकारी दिएका छन् । सोमबार दिउँसो अदालतले जिल्ला प्रहरी कार्यालय कास्कीलाई पक्राउ पुर्जी पठाई सकेको छ । घटना भएकै दिनदेखि फरार रहेका कार्यालय प्रमुख दासलाई यस अघि प्रहरीले पक्राउ पुर्जी जारी गरी खोजतलास गरे पनि भारततर्फ भागेको हुँदा पक्राउ गर्न भने सकेन ।

‘अदालतमा आरोपपत्र दर्ता भइसक्दासमेत फरार रहेका दासविरुद्ध अदालतले सोमबार पक्राउ पुर्जी जारी गरेको हो । अदालतले मुलुकी फौजदारी कार्यविधि संहिता ०७४ को दफा ५८ र उपदफा ७ अन्तर्गत रहेर अनुसूची २५ बमोजिम पक्राउ पुर्जी जारी गरेको हो,’ रिजालले भने ।

प्रहरी प्रतिवेदनअनुसार जिल्ला सरकारी वकिलको कार्यालयले जिल्ला अदालतमा मुद्दा दर्ता गरेको थियो । आईतबार भएको थुनछेक बहसका क्रममा पश्चिमाञ्चल ट्रेडर्सका पेट्रोलपम्प सञ्चालक बाबुराम जम्कट्टेललाई डेढ लाख रुपैयाँ, गण्डकी धौलागिरि पेट्रोलियम डिलर्स एसोसिएसनका कार्यालय सचिव जगन्नाथ ढुंगानालाई एक लाख रुपैयाँ र ट्यांकरचालक निर्मल थापालाई ७५ हजार रुपैयाँ धरौंटीमा रिहा गर्न अदालतले आदेश दिएको थियो । अदालतमा दायर भएको आरोप पत्रमा जम्कट्टेल, ढुंगाना र थापालाई समान तीन वर्षसम्म कैद वा तीन वर्षसम्म कैद वा तीस हजार रुपैयाँसम्म जरिवाना वा दुवै सजाय माग गरिएको छ ।

जिल्ला अदालतमा दायर भएको आरोप–पत्रमा दासलाई पाँच वर्षसम्म कैद र पचास हजार रुपैयाँसम्म जरिवाना गर्नुपर्ने माग दाबी गरिएको छ । त्यस्तै, सरकारी सेवामा रहेर सरकारी सम्पत्तिमा हानीनोक्सानी पु¥याएकाले फौजदारी कसुर (सजाय निर्धारण तथा कार्यान्वयन) सम्बन्धी नियमावली ०७५ को दफा १५ (२) को ङ अनुसार हुने सजायको डेढी सजायको पनि माग गरिएको छ ।

दासलाई पक्राउ गरेपछि वा आफैँ अदालतको सम्पर्कमा आएपछि सुरुमा आरोपितसँग बयान लिइने र बयानपछि थुनछेक बहस सुरु हुनेछ । त्यसक्रममा पक्ष र विपक्षको बहस सुनेर धरौटीमा छाड्ने वा हिरासतमा राखेर आवश्यक अनुसन्धान गर्ने भन्ने निर्णय अदालतले गर्नेछ ।

डिपोबाट यहीं साउन २५ गते १२ हजार लिटर डिजेल बिक्री गरेको बिल बनाई १५ हजार तीन सय लिटर पठाएको भन्दैं जिल्ला प्रशासन कार्यालय कास्कीको टोलीले ट्यांकरसहित चालकलाई पक्राउ गरेको थियो । चालक र ट्यांकर पक्राउ परेसँगैं सोही साँझ दास कार्यालयमा चावी लगाई सम्पर्कविहिन भएका थिए ।

विवादित दास सम्पर्कमा पनि नआएपछि तत्कालै नेपाल आयल निगमले सेवाबाट निलम्बन गरेको थियो । एकातर्फ जिल्ला प्रशासन कार्यालय कास्कीले यो मुद्दाको अनुसन्धान गर्न फाईल अख्तियार दुरुपयोग अनुसन्धान आयोगको कार्यालय पोखरामा पठाएको थियो । अर्कोतर्फ घटनाबारे लेखनाथमा रहेको ईलाका प्रहरी कार्यालय, हंसपुरले विस्तृत छानबिन गरी ठगी कसुरमा मुद्दा चलाउन सरकारी वकिलको कार्यालयमा प्रतिवेदन बुझाएको थियो ।