पोखरा, २५ भदौं । सूर्यदर्शन बचत तथा ऋण सहकारी संस्था लिमिटेड पोखराका कोषाध्यक्ष, ग्यालेक्सी फोर के टेलिभिजनका सञ्चालक एवं गोरखा मिडिया नेटवर्क प्रालिका उपाध्यक्ष समेत रहेका कुमार रम्तेललाई प्रहरीले  पक्राउ गरेको छ । काठमाडौं उपत्यका अपराध अनुसन्धान कार्यालयले रम्तेललाई ललितपुरको कुमारीपाटीबाट पक्राउ गरेको थियो । पोखरादेखि देशभरका टोलेगुण्डाहरुसँग मिलेर सहकारीको रकम हिनामिना गर्दै आईरहेका जीबी राई समूहले १६ अर्बभन्दा बढी रुपैयाँ ठगी गरेको आरोप लागेको छ ।

जिल्ला प्रहरी कार्यालय कास्कीका प्रमुख एसपी मोहनकुमार थापाले भर्खरैं कुमार रम्तेललाई पक्राउ गरिएको जानकारी दिए । सूर्यदर्शन बचत तथा ऋण सहकारी पोखरा र ग्यालेक्सी फोर के टेलिभिजनका सञ्चालक जीबी राई (गितेन्द्र) भने हालसम्म फरार छन् ।

काठमाडौं उपत्यका अपराध अनुसन्धान कार्यालयले कुमार रम्तेललाई ललितपुरको कुमारीपाटीबाट पक्राउ गरी थप कारवाहीका लागि जिल्ला प्रहरी कार्यालय कास्कीमा पठाएको छ ।

जिल्ला प्रहरी कार्यालय कास्कीले जीबी राई र कुमार रम्तेलसहित यो समूहका ७ जना विरुद्ध भदौं २२ गते जिल्ला अदालत कास्कीमा मुद्दा दर्ता गर्दै पक्राउ पुर्जी जारी गरेको थियो । काठमाडौं उपत्यका अपराध अनुसन्धान कार्यालयले रम्तेललाई थप अनुसन्धानका लागि पोखरा पठाएको छ ।

यो समूहले पोखरामा रहेको सूर्यदर्शन बचत तथा ऋण सहकारी संस्थामा ९ सय ७१ जना बचतकर्ताहरुको १ अर्ब ८ करोड ११ लाख ८६ हजार ८ सय ३९ रुपैयाँ रकम हिनामिना गरेका थिए । सो सहकारीको कुल कारोबार १ अर्ब ५५ करोड रुपैयाँ रहेको छ ।

सूर्यदर्शन बचत तथा ऋण सहकारी संस्थाको नाममा यो समूहले पोखराबाट कारोबार शुरु गरेको थियो । हाल यस सहकारीको अध्यक्षमा थानबहादुर बुढा र कोषाध्यक्षमा जीबीका मुख्य सहयोगी कुमार रम्तेल रहेका थिए ।