लमजुङ, १९ भदौं । लमजुङका वित्तीय संस्थाहरुले चोरीका गहना बिना बिल र प्रमाण धितोमा राखेर ऋण दिएको भेटिएको छ । एक युवतीले चोरिएका सुनका गरगहना राखेर नेपाल बैंक लिमिटेडबाट बिना बिल ऋण लिएको भेटिएपछि यो रहस्य खुलेको हो ।

बेशीसहर नगरपालिका वडा नं. ७ की २७ वर्षीया सुजा घिमिरे दुईवटा घरबाट २३ तोला भन्दा बढि सुनका गरगहना चोरेको सप्रमाण भेटेपछि प्रहरीले पक्राउ गरेको छ । चोरिएको सुन मध्येबाट जम्मा ३ तोलामात्र बैंकमा राखेर धितो राखेर सुजाले ‘गोल्ड लोन’ लिएकी थिईन् । सुजामाथि जिल्ला अदालत लमजुङबाट सोमबार पाँच दिनको म्याद थप गरी थप अनुसन्धान भईरहेको प्रहरी निरीक्षक बुद्धिप्रसाद सुवेदीले जानकारी दिएका छन् ।

चोरिएको गहना नेपाल बैंक लिमिटेडमा राखेर ऋण लिएपछि चोरीमा संलग्न सुजा प्रहरीको फन्दामा परेकी थिईन् । ३ तोला सुन धितो राखेर एकलाख ८० हजार रुपैयाँ सुजाले ऋण लिएकी थिईन् । बैंकले सुजाको चोरी गरेर ल्याएको सुन बिल बिना नै धितोमा राखी ऋण दिएको थियो ।

सुजाले एउटा रानीहार, दुईवटा बाला, चार वटा औंठी, सिक्री, मिनिहार र टप लगायत गरगहनाहरू चोरी गरेकी थिईन् । प्रहरीले बैंकबाट र सुजाको कोठाबाट चोरिएका बाँकी गरगहनाहरु बरामद गरेको थियो । चोरीको घटनाको अनुसन्धान गरिरहेका प्रहरी अधिकृतहरुले यसरी चोरिएका गहनाहरु बिना बिल बैंकले राखिदिँदा अन्य यस्ता घटनाहरु भएको र ‘गोल्ड लोन’को दुरुपयोग भएको बताएका छन् ।

गत वैशाख २५ गते लमजुङ वेशीशहर वडा ७ क्याम्पस रोडस्थित सुजाकी साथी जमुना रिमालको घरबाट सुनका गरगहना चोरी भएको थियो । घरबाट ठुलो परिमाणमा सुनका गरगहना चोरी भएपछि फिर्ता पाउने सम्भावना नरहेको भन्दैं पीडित परिवारले प्रहरीलाई खबर नै गरेनन् । सुजा यहीं घरमा रहेको एक गैरसरकारी संस्थामा कार्यरत थिईन् ।

यसरी नैं पुनः साउन ३० गते बेशीसहरमै अर्को चोरीको घटना भयो । वडा नम्बर ७ कै न्यू इरा बोर्डिङ स्कुल नजिकै रहेको बालकुमारी घिमिरेको घरबाट पनि गरगहना चोरी भयो । एकै वडामा एकै प्रकृतिले सुनका गरगहना चोरिएपछि यो घटनामा भने प्रहरीलाई खबर गरियो । उक्त चोरीबारे हल्लाखल्ला भएपछि सुजाले आफ्नो पनि सुन चोरी भएको भन्दै जमुनासँग झुटो कुराकानी गर्न पुगेकी रहिछन् ।

दुबै चोरीका घटना एकै प्रकृतिका देखिए । चोरले सुनका गरगहना चोरी गर्दा कतै पनि तोडफोड गरेको देखिएन । दुवै ठाउँमा सजिलैंसँगै चोरी भएको देखियो । प्रहरीले दुवै घटनामा एकै समूहको संलग्नता भएको आँकलनका साथ अनुसन्धान गर्दै थियो । अनुसन्धानको क्रममा प्रहरीले दुई वटैं घटनाको कनेक्सन सुजासँग भएको पत्ता लगाउन पुग्यो ।

‘अर्को चोरी पनि भएपछि पक्राउ परेकी युवतीले जमुनासँग आफ्नो पनि गहना हराएको भनेकी रहेछन्,’ प्रहरी निरीक्षक बुद्धिप्रसाद सुवेदीले भने, ‘यसरी उनीहरू दुबैले प्रहरीमा जानुपर्छ भनेर भदौ १ गतेतिर चोरी भएको भनेर निवेदन दिएका थिए ।’

साउन ३० गते चोरी भएको दिनमा सुजाले बालकुमारीलाई सम्पर्क गरेको भेटिएपछि प्रहरीलाई उनीमाथि शंका गरेको थियो । बालकुमारकी छोरी सुजाकी साथी थिईन् । जो अमेरिकामा बस्थिन् । घर परिवारसँग पनि राम्रो सम्बन्ध भएका कारण सुजा बारम्बार आईरहन्थिन् ।

प्रहरीले चोरीमा सुजाको संलग्नता रहेको आशंका गरेपछि उनीमाथि अनुसन्धान र सोधपुछ शुरु ग¥र्यो । सोधपुछका क्रममा सुजाले आफु बालकुमारीको घरमा फोन गरेर गमलामा लगाउन मल लिन पुगेको बताईन् । प्रहरीले सुनचाँदी पसल र अन्यत्र कतै बेचिएको छ कि भन्दैं अनुसन्धान गर्दै थियो । सोही क्रममा प्रहरीले नेपाल बैंक लिमिटेडबाट सुजाले गरगहनाहरु धिता राखेर ऋण लिएको पत्ता लगायो । तत्कालैं प्रहरीले उनलाई पक्राउ गर्यो र कोठामा खानतलासी गर्दा अन्य चोरिएका गरगहनाहरु पनि भेटिए । र, अन्तमा सुजा प्रहरीको फन्दामा परिन् ।