पोखरा अन्तर्राष्ट्रिय विमानस्थल सञ्चालन र गाईवस्तुमा देखिएको लम्पी स्किन रोगको नियन्त्रणसम्बन्धी छलफल हुने’

पोखरा, ३० साउन । दुईपटकसम्म स्थगन भएको गण्डकी प्रदेश सभाको बैठक आज बस्दैछ । दिउँसो १ बजे बस्ने बैठकमा विषयगत समितिमा बस्ने सदस्यको नाम प्रस्तुत प्रस्तुत हुने प्रदेश सभा सचिवालयले जानकारी दिएको छ ।

गत बिहीवार र सोमवार सरकारले बिजनेस दिन नसकेपछि बैठक स्थगन भएको थियो । तर आजको बैठकमा वन विधेयक पेश हुने र त्यसमा छलफल हुने सचिवालयले जानकारी दिएको छ । प्रदेश सभाको दोस्रो कार्यकाल सुरु भएको सातौं महिना बितिसक्दा पनि ‘मिनी संसद्’ मानिने विषयगत समिति आजसम्म गठन हुन सकेको थिएन ।

प्रदेशसभा नियमावली अनुसार प्रदेशसभामा अर्थ तथा विकास, सार्वजनिक लेखा, प्रदेश मामिला तथा कानुन र सामाजिक विकास तथा कृषि समिति गरी चार विषयगत समिति रहनेछन् ।

आजको बैठकमा प्रमुख प्रतिपक्ष नेकपा (एमाले)ले दुईवटा जरुरी सार्वजनिक महत्वका प्रस्ताव पनि सचिवालय दर्ता गरेको छ । एउटा पोखरा अन्तर्राष्ट्रिय विमानस्थल सञ्चालन र अर्को गाईवस्तुमा देखिएको लम्पी स्किन रोगको नियन्त्रणसम्बन्धी रहेका छन् ।