काठमाडौं, २६ असार । मनाङ एयरको हेलिकप्टर लाम्जुरापास क्षेत्रमा दुर्घटनाग्रस्त अवस्थामा भेटिएको छ । हेलिकप्टरमा सवार ६ जना मध्ये ५ यात्रुको शव भेटिएको छ । शवको पहिचान भने हुन सकेको छैन ।

आज विहान ९ बजेर ५२ मिनेटमासोलुखुम्बुको सुर्केबाट काठमाडौंका लागि उडेको हेलिकप्टर विहानको १० बजेर १ मिनेट जाँदा सोलुखुम्बुको लाम्जुराबाट सम्पर्कविहीन भएको थियो । घटनास्थलमा सुरक्षाकर्मीको टोली पुगेर उद्धारको काम सुरु गरिसकेको प्रहरी सहायक निरीक्षक निराजन बस्नेतले सञ्चारमाध्यमलाई जानकारी दिउका छन् ।

नागरिक उड्डयन प्राधिकरणका सहप्रवक्ता ज्ञानेन्द्र भुलका अनुसार सुर्कीबाट उडेको सो हेलिकप्टरमा चालक चेतबहादुर गुरुङसहित ५ जना विदेशी यात्रु सवार थिए । लुक्ला विमानस्थलको मौसम खराब भएकाले काठमाडौंबाट गएको उक्त हेलिकप्टर सुर्केमै अवतरण गरिएको थियो । यात्रुहरूलाई सुर्केसम्म गाडीबाटै ल्याएर काठमाडौं उडाइएको थियो ।

हेलिकप्टर लामाजुराडाँडासम्म सम्पर्कमा रहेको र काठमाडौंको टावरलाई ह्यान्डओभर गर्नासाथ सम्पर्कविच्छेद भएको तेन्जिङ हिलारी विमानस्थल लुक्लाका एटीसी अफिसर सागर कँडेलले जानकारी दिए ।