पोखरा, ७ चैत । मध्यराती फोन गरेर नेपाल पत्रकार महासंघ कास्कीका अध्यक्ष विमला भण्डारीलाई धम्क्याउँदै महासंघ कास्की शाखाको कार्यालयमा आगो लगाई ध्वस्त पारिदिने धम्की दिएका एमालेका कार्यकर्ता अर्जुन गिरीका विरुद्धमा पत्रकारहरुका विभिन्न संघसंगठनहरुले संयुक्त प्रेस विज्ञप्ति जारी गर्दै विरोध जनाएका छन् ।

राती ११ बजेर ८ मिनेट जाँदा अध्यक्ष विमला भण्डारीलाई फोन गरेर धम्क्याउने एमालेका कार्यकर्ता अर्जुन गिरी

नेपाल प्रेस युनियन कास्कीका सचिव प्रदिप पौडेल, प्रेस सेन्टर कास्कीका अध्यक्ष कृष्ण दवाडी, समाजवादी प्रेस संगठन कास्कीका अध्यक्ष गणेश बराल, स्वतन्त्र पत्रकार संघ कास्कीका अध्यक्ष असफल गौतम र प्रेस सेन्टर पोखरा महानगर समितिका अध्यक्ष शिवराज बस्ताकोटी ‘शिव दाइ’ले संयुक्त रुपमा प्रेस विज्ञप्ति निकाल्दै घटनाप्रति खेद प्रकट गरेका छन् ।

मिति २०७८ चैत ५ गते मध्यराति ११ बजेर आठ मिनेट जाँदा नेकपा एमालेका जिल्ला सदस्य, वडा नं. २१ का इञ्चार्ज र प्रेस चौतारी कास्कीका अध्यक्ष समेत रहेका अर्जुन गिरीले आमपत्रकारको साझा संस्था नेपाल पत्रकार महासंघ कास्कीको भवनमा आगो लगाउने भन्दै नेपाल पत्रकार महासंघ कास्की शाखाका अध्यक्ष विमला भण्डारीलाई फोनमार्फत् धम्की दिएको घटनाप्रति गम्भिर ध्यानाकर्षण भएको विज्ञप्तिमा उल्लेख छ ।

‘खेलकुद पत्रकार मञ्च गण्डकीको निर्वाचनपछि नयाँ कार्यसमितिलाई नेपाल पत्रकार महासंघको सभाहलमा पदस्थापना गराउन खेलकुद पत्रकार मञ्चका निवर्तमान अध्यक्षकैं प्रस्तावमा निर्वाचन समितिले गरेको आग्रहलाई नेपाल पत्रकार महासंघले स्वीकार गरेको हो ।’ विज्ञप्तिमा भनिएको छ–‘यस विषयलाई लिएर पत्रकारहरुको छाता संस्थामाथि धावा बोल्ने निकृष्ट कार्यको हामी कास्कीमा क्रियाशिल पत्रकारसँग सम्बन्धित संघसंगठनहरु खेद प्रकट गर्दछौं ।’

पत्रकारसँग सम्बन्धित एउटा संगठनको जिम्मेवार व्यक्तिले नै देखाएको यस प्रकारको असभ्य र अशोभनीय गतिविधिप्रति भत्र्सना गर्दै आत्मालोचना गर्न समेत विज्ञप्तिमा सचेत गराईएको छ । ‘आगामी दिनमा उत्तेजित र यस्ता खाले अभिव्यक्तिहरुले प्रेस स्वतन्त्रता र महासंघ कैं गरिमामा आँच आउने हाम्रो ठहर छ । चित्त नबुझे वार्ता, छलफल र संवादमार्फत् समस्या समाधान खोज्न सकिने छ ।’ विज्ञप्तिमा भनिएको छ ।

पत्रकार महासंघको भवन समग्र पत्रकारसँगै सबै पोखरेलीहरुको सम्पत्ति भएको हुँदा यसलाई संरक्षण गर्नु हामी सबैको साझा दायित्व भएको ठहर पनि विज्ञप्तिमा गरिएको छ ।