पोखरा, ६ चैत । नेकपा एमालेका कार्यकर्ताले नेपाल पत्रकार महासंघ कास्कीको कार्यालयमा आगो लगाएर ध्वस्त पारिदिने भन्दै धम्की दिएका छन् । पत्रकार महासंघ कास्कीका अध्यक्ष विमला भण्डारीलाई एमालेका कास्की जिल्ला सदस्य एवं वडा नं. २१ का इञ्चार्ज अर्जुन गिरीले मध्यरातमा फोन गर्दै धम्की दिएपछि यस्ता धाकधम्कीपूर्ण व्यवहार नगर्न नेपाल पत्रकार महासंघ कास्की शाखाले प्रेस विज्ञप्ति नै जारी गरेको छ ।

नेपाल खेलकुद पत्रकार मञ्च गण्डकीको दोस्रो अधिवेशनबाट नवनिर्वाचित कार्यसमितिको पदस्थापन कार्यक्रम नेपाल पत्रकार महासंघ कास्कीको सभाहलमा गर्न दिएमा कार्यालयमा नै आगो लगाएर ध्वस्त पारिदिने धम्की एमालेका कार्यकर्ता गिरीले दिएको विज्ञप्तिमा उल्लेख छ ।

विज्ञप्तिमा सिंङ्गो महासंघको स्वाभिमानमा आँच आउने गरी एमालेको भातृसंगठन प्रेस चौतारी नेपाल कास्कीका अध्यक्ष समेत रहेका गिरीले दिएको धम्की समग्र पत्रकारको भावनामाथि आघात पुगेको ठहर गरेको छ । श्रमजीवी पत्रकारहरुको रगत, पसिना, आमपोखरावासीको साथ र सहयोगबाट महासंघको भवन निर्माण गरिएको थियो । भवनमा निर्माण गरिएको सभाहलमा विभिन्न संघसंस्थालाई कार्यक्रमहरु सञ्चालन गर्न दिदैं आईरहेको जानकारी गराउँदै महासंघले यस्तो खालको धाकधम्कीपूर्ण व्यवहार नगर्न सहसचिव श्रीराम सिग्देलले जारी गरेको विज्ञप्तिमा उल्लेख गरिएको छ ।