मोरङ, २९ फागुन । १९ महिने बालिकालाई बलात्कार पछि हत्या गरेको आरोपमा प्रहरीले दुईजनालाई पक्राउ गरेको छ । जिल्ला प्रहरी कार्यालय मोरङले बलात्कारको आरोपमा ती बालिकाका दुईजना छिमेकीलाई पक्राउ गरेको हो । पक्राउ परेकाहरुलाई प्रहरीले आज दिउँसो २ बजे पत्रकार सम्मेलन गरेर सार्वजनिक गर्ने भएको छ ।

घरबाट हराएकी सुन्दरहरैंचा नगरपालिका–७ की १९ महिने बालिकाको नोबेल मेडिकल कलेज विराटनगरमा उपचारका क्रममा शुक्रबार राति मृत्यु भएको थियो । घरबाट शुक्रबार ४/५ बजेतिर हराएकी बालिका घरभन्दा पश्चिम गछिया खोला किनारको झाडीमा रोइरहेको अवस्थामा अभिभावकले साँझ ६ बजेतिर फेला पारेका थिए ।

टाउको लगायत शरीरका विभिन्न भागमा चोट देखिएकी बालिकालाई नजिकैको स्वास्थ्य क्लिनिकमा लगेपछि स्वास्थ्यकर्मीले योनीबाट रगत बगेको देखेर बलात्कार भएको आशंका गरी थप उपचारका लागि विराटनगर लगिएको थियो । तर बालिकाको उपचारका क्रममा निधन हुन पुग्यो ।