विराटनगर, २८ फागुन । मोरङको सुन्दर हरैचा- ७ मा अर्धचेत अवस्थामा भेटिएकी नाबालिकाको उपचारको क्रममा मृत्यु भएको छ । अस्पताल स्रोतका अनुसार २१ महिने बालिकाको यौनाङ्गमा गम्भीर चोट देखिएको छ । घटना शंकास्पद भएकाले प्रहरीले अनुसन्धान शुरु गरेको छ ।

मोरङमा प्रहरी उपरीक्षक जनार्दन जिसीले घटना र नाबालिकाको अवस्था गम्भिर देखिएकोले बालिकाको शव पोष्टमार्टमका लागि विपी कोइराला स्वास्थ्य विज्ञान प्रतिष्ठान धरान पठाइएको जानकारी दिए ।

शुक्रबार साँझ बेलुकी ४ बजेबाट घरबाट हराएकी ती २१ महिने बालिका घरनजिकैको झाडीमा साँझ ५ बजेतिर अर्धचेत अवस्थामा भेटिएकी थिइन् । उनको उपचारको क्रममा आज बिहान नोबेल मेडिकल कलेज विराटनगरमा मृत्यु भएको हो ।

सुन्दरहरैचा ७ का वडा अध्यक्ष चैतन्य सिटौलाका अनुसार बालिकाको बलात्कार भएको आशंका गरिएको छ । ‘यौनाङ्गमा रक्ताम्य भएकी बालिकालाई भेटेपछि आफन्तले गछिया मेडिकलमा लगेका रहेछन्’उनले भने ‘गछिया पुगेपछि प्रहरीलाई खबर गरेर थप उपचारका लागि नोबेल लगिएको थियो । आज मृत्यु भयो ।’