काठमाडौं, ११ फागुन । भरोसा नेपाल बहुउद्देश्यीय सहकारी काठमाडौंका अध्यक्ष र उपाध्यक्षलाई ६ करोड २५ लाख रुपैयाँ भन्दा बढि ठगी गरेको आरोपमा प्रहरीले पक्राउ गरेको छ । प्रहरीले काठमाडौं–३० बस्ने ४२ वर्षीय सहकारीका अध्यक्ष सुरज बस्नेत र काठमाडौं–१६ बस्ने सहकारीका उपाध्यक्ष शिव पाण्डेलाई बुधबार पक्राउ गरेको हो ।

काठमाडौं वडा नं. ३१ मा रहेको भरोसा नेपाल बहुउद्देश्यीय सहकारी संस्थाका अध्यक्ष र उपाध्यक्षद्वय निक्षेपकर्ताहरुले निक्षेप रकम माग्दा सहकारीमा नैं ताला लगाई फरार भएका थिए । ६ करोड २५ लाख ठगी गरेको आरोपमा प्रहरीले दुई जना सञ्चालक समितिका अध्यक्षलाई पक्राउ गरिएको केन्द्रीय अनुसन्धान ब्युरोले पक्राउ गरेको प्रवक्ता प्रहरी उपरीक्षक श्यामकुमार महतोले जानकारी दिएका छन् ।

प्रहरीका अनुसार सहकारीका निक्षेपकर्ता सदस्यहरूले संस्थामा बचत तथा आवधिक खाता खोलेर जम्मा गरेको रकम उनीहरुले हिनामिना गरेको आरोप लागेको छ । सहकारीबाट उठेको रकम सहकारी संस्थाको खातामा नराखी उनीहरूले आफूखुसी आफ्नै परिवार सदस्य तथा आफन्तहरूको नाममा राखेको प्रहरीको अनुसन्धानबाट खुलेको छ ।

प्रारम्भिक अनुसन्धानबाट १५ जना निक्षेपकर्ताको ६ करोड २५ लाख रकम हिनामिना गरेको प्रहरी उपरीक्षक महतोले जानकारी दिए । उनीहरूबाट अन्य बचतकर्ताहरू पनि ठगिएको हुनसक्ने भन्दै ब्युरोको सम्पर्कमा आउन प्रहरीले अनुरोध गरेको छ ।