पर्वत, १८ भदौं । हिजोदेखि परेको अविरल परेको वर्षाका कारण पर्वत जिल्लाका विभिन्न ठाउँहरुमा गएको पहिरोमा परी १० जनाको ज्यान गएको छ भने एकजना वेपत्ता भएका छन् । वेपत्ताको खोजी र घाईतेहरुको उद्धार कार्य प्रहरीले जारी राखेको छ ।

पर्वतको कुश्मा नगरपालिका वडा नं.३ दुर्लुङ भोगेनी बस्ने माधव शर्माको घर माथिबाट आएको पहिराले घर पुरिदाँ १६ बर्षीया छोरी बिमला पौडेल, ११ बर्षीया छोरी बिनिता पौडेल र ७५ बर्षकी आमा कौशिला पौडेल, शर्माकी श्रीमती ३५ बर्षीया भगवती पौडेल र ९ बर्षीय छोरा बिनोद पौडेलको मृत्यु भएको थियो ।

त्यसैगरी, कुश्मा नगरपालिका वडा नं. ११ सिल्मी बस्ने मनिलाल पौडेलको घर माथिबाट पहिरो आएर घर नैं पुरिदाँ पाहुना बस्न आएका आमाछोरा नै वेपत्ता हुन पुगेका छन् । पौडेलको घरमा पाहुना आएका मोदी गाउँपालिका वडा नं. ७ राम्जाकी अन्दाजी ३८ बर्षीया दुर्गा पौडेल र उनका ६ बर्षीय छोरा गणेश पौडेल वेपत्ता हुन पुगेका छन् । प्रहरीले आज वेपत्ता आमाछोराको खोजी कार्य जारी राखेको छ ।

पर्वत कैं मोदी गाउँपालिका वडा नं. ५ अम्बोटमा अबिरल वर्षाको कारण ओखलढुङ्गा सामुदायिक वनबाट आएको पहिरोले घरधनी ५० बर्षीय फुलमाया थापाको मृत्यु भएको छ । पहिरोले घर बगाउँदा फुलमाया पुरिएकी थिईन् । स्थानीय र प्रहरीको टोलीले खोजी गर्दा थापालाई मृत अवस्थामा भेटेको थियो ।

त्यसैगरी, पर्वत जिल्ला कैं कुश्मा नगरपालिका वडा नं. ११ पपुवा पाल्चे स्थित हरि पौडेलको घर पहिरोको कारण भत्किँदा परिवारका ३ जना सदस्यहरु पुरिएका थिए । पहिरोमा परेर पौडेलकी ४० बर्षीया श्रीमती मायाकुमारी र ३ बर्षको छोरा प्रयुसको मृत्यु भईसकेपछि भेट्टिएको थियो । सो पहिरोमा परी ७० बर्षीया वृद्ध आमा डल्ली पाध्या वेपत्ता भएकी छिन् । वेपत्ता वृद्धा डल्ली पाध्याको खोजी कार्य जारी रहेको छ ।

अविरल परेको वर्षाका कारण पहिरो झर्दा पोखरा–कुश्मा सडक खण्ड अवरोध भएको गण्डकी प्रदेश प्रहरी कार्यालय पोखराले जानकारी दिएको छ ।