पोखरा । जबरजस्ती करणी मुद्दाका प्रतिवादीलाई छुटाई दिन्छौं भन्दै रकम ठगी गर्ने गिरोह मध्येका फरार भोजराज त्रिपाठीलाई जिल्ला प्रहरी कार्यालय कास्कीले पक्राउ गरेको छ । प्रहरीले पोखरा महानगरपालिका वडा नं. १८ सराङकोट बस्ने ४९ वर्षीय त्रिपाठीलाई हिजो बुधबार सराङकोटबाट पक्राउ गरेको हो ।

गत वर्ष फागुन १९ गते प्रहरी, वकिल र अदालतसँग सेटिङ मिलाई दिने भन्दै १ करोड रकम माग गरेको यो गिरोहका अन्य दुईजना सुर्यलाल खड्का र कमन भन्ने कमानबहादुर तामाङलाई प्रहरीले यस अघि नै पक्राउ गरिसकेको छ । उनीहरुले १ करोड रुपैयाँ दिएमा मुद्दा मिलाई दिने नत्र १५ बर्ष जेल जानु पर्ने भन्दै वार्गेनिङ गरेको जिल्ला प्रहरी कार्यालय कास्कीले जारी गरेको विज्ञप्तिमा उल्लेख छ ।

झुठो आश्वासन तथा विश्वास दिलाई पीडकबाट १२ लाख रुपैयाँको चेक र एकलाख १० हजार रुपैयाँ नगद लिई ठगी गरेको आरोपमा कास्की प्रहरीले पोखरा–१७ राष्ट्रबैंकचोकस्थित एक खाजाघरबाट सूर्यलाल खड्का र कमन भन्ने कमानबहादुर तामाङलाई पक्राउ गरेको थियो । सोही क्रममा फरार रहेका त्रिपाठीलाई प्रहरीले हिजो बुधबार पक्राउ गरी ठगी तथा जबरजस्ती करणी कसुरमा मिलापत्र गर्न गराउन नहुने मुद्दामा कारवाही अगाडि बढाएको छ ।