काठमाडौं । अवैध रुपमा नेपाल भित्रिने मोवाइलहरु अब नचल्ने भएका छन् । सरकारले आगामी साउन १ गतेदेखि सञ्चालन ल्याउने लागेको मोबाइल डिभाइस म्यानेजमेन्ट सिस्टम (एमडीएमएस)का कारण अवैध मोवाइलहरु नचल्ने भएका हुन् ।

मोबाइल डिभाइस म्यानेजमेन्ट सिस्टम (एमडीएमएस) सञ्चालनमा आएपछि अवैध रुपमा नेपाल भित्रिएका (बिना दर्ता) मोबाइल फोन नियन्त्रणमा आउने अर्थमन्त्री विष्णु पौडेलले बताए । अर्थमन्त्री पौडेलले आर्थिक वर्ष २०७८/७९ को बजेट सार्वजनिक गर्दै सो जानकारी दिएका हुन् ।

नेपाल दूरसञ्चार प्राधिकरणले अवैध रुपमा भित्रिएका मोबाइल बन्द गराउनका लागि पाँच वर्ष अघि देखि नै इन्टरनेसनल मोबाइल इक्विपमेन्ट आइडेन्टिटी (आइएमइआई) नम्बर दर्ता गराउने काम गर्दै आईरहेको थियो । आइएमइआई नम्बर ‘युनिक कोड’ दर्ता गर्न सुरु गरिसकेको थियो । पहिलो चरणमा आइएमइआई नम्बर दर्ता र दोस्रो चरणमा मोबाइल डिभाइस म्यानेजमेन्ट सिस्टम ण्एमडीएमएस) जडान गर्ने भएको छ ।

प्राधिकरणले २०७४ साल वैशाख २८ गते अवैध मोबाइल रोक्ने प्रणाली (एमडीएमएस) जडान गर्न परामर्शदाता छनोटका लागि टेन्डर आह्वान गरिसकेको थियो । जसमा १३ कम्पनीको आवेदन परेको थियो ।

प्राधिकरणले २०७६ असारमा ओएसआई कन्सल्टिङ प्रालि भारत र नमस्ते ग्लोबल कम प्रालि सिंगापुरको ज्वाइन्ट भेन्चर छनोट गरेको थियो । ८० करोड रुपैयाँमा ठेक्का परेको त्यस कम्पनीले ६ महिना भित्रमा उक्त सिस्टम जडान गरी पुस महिनाभित्रमा एमडीएमएस प्रणाली सञ्चालनमा ल्याउनु पर्ने शर्त थियो ।

तर गत वर्षदेखिको कोरोना संक्रमणको महामारी र निषेधाज्ञाका कारण एमडीएमएस प्रणालीको जडान कार्य रोकिएको थियो । अब साउन १ गतेदेखि मोबाइल डिभाइस म्यानेजमेन्ट सिस्टम (एमडीएमएस) सञ्चालनमा आउने गरी सरकारले तयारी अघि बढाएको छ ।