पोखरा । कास्की मादी गाउँपालिका वडा नं. ४ का वडाध्यक्ष सत्यराज सापकोटाले सई टिकाराम न्यौपानेसँग बल्ल माफी मागेका छन् । ईलाका प्रहरी कार्यालय मादीका तत्कालिन प्रहरी प्रमुख सई टिकाराम न्यौपानेलाई वडाध्यक्ष सापकोटाले अश्लिल शब्दहरु प्रयोग गर्दै फोनबाट धम्की दिएका थिए ।

जिल्ला प्रहरी कार्यालय कास्कीमा वडाध्यक्ष सापकोटाले जेठ ९ गते सई न्यौपानेसँग माफी मागेका हुन् । जिल्ला प्रहरी कार्यालय कास्कीका प्रहरी प्रमुख जीवन श्रेष्ठले राजनीतिक दलको दवावका कारण वडाध्यक्षलाई कारवाही गर्नुको साटो सरुवाका नाममा प्रहरीको मनोबल गिर्ने गरी सई न्यौपानेलाई त्यहाँबाट नै हटाई दिएका थिए ।

गत वैशाख १२ गतेको घटनामा कास्की प्रहरीले कारवाही गर्नुको साटो गण्डकी प्रदेश प्रहरी कार्यालयमा गलत रिपोटिङ गरेको थियो । पटक–पटक प्रहरी जघन्य अपराधहरुमा चिप्लिएको कास्की प्रहरी यो घटनामा पनि सत्तापक्षका नेताहरुको दवावका कारण दोषी वडाध्यक्षलाई कारवाही गर्न सकिरहेको थिएन । प्रहरी संगठन कै माथिल्लो निकायबाट सोधपुछ भएपछि बल्ल ढिलै भएपनि सई न्यौपानेले केही राहत महसुस गर्न पाएका छन् ।

यस विषयमा डन न्यूजले जेठ ५ गते गण्डकी प्रदेश प्रहरी कार्यालय पोखराका प्रमुख डिआईजी घनश्याम अर्याललाई सईलाई मनपरी बोल्ने मादी गाउँपालिका वडा नं. ४ का वडाध्यक्षलाई कारवाही भयो कि भएन भनेर सोधेका थियौं । यस विषयमा गण्डकी प्रदेश प्रहरी कार्यालय पोखराका प्रमुख डिआईजी अर्यालले त्यतिबेला भनेका थिए–‘वडाध्यक्षलाई झिकाएर कारवाही भईसकेको छ । मैले एसपीलाई कारवाही गर्नुस् भनिसकेको छु । यस विषयमा थप एसपीसँग बुझ्नुहोस् ।’

जतिबेला डिआईजी अर्यालले कारवाही भईसक्यो भनेर सञ्चारमाध्यमलाई जानकारी दिदैं थिए, त्यतिबेलासम्म कास्की प्रहरीले यो विषयमा कुनै पनि कारवाही अगाडि बढाएको थिएन । डिआईजी अर्यालले कारवाही भईसक्यो भन्ने जवाफ दिएको ४ दिनपछि मात्र कास्की प्रहरीले बल्ल गाउँपालिकाका अध्यक्ष सापकोटालाई झिकाएर माफी मगाएको थियो ।

घटनाका पीडित सई न्यौपानेले डन न्यूजसँगको कुराकानीमा भने–‘मलाई चित्त नबुझे पनि आफूभन्दा माथिका सरहरुले भने पछि मान्नै पर्यो । तर एउटा बर्दीमा रहेको र ड्युटीमा खटिएको प्रहरीलाई फोन गरेर अश्लिल शब्द प्रयोग गर्नु प्रहरी संगठन कैं लागि दुःखद घटना हो ।’