काठमाडौं । कोरोना संक्रमणका कारण एक प्रहरी अधिकृतको मृत्यु भएको छ । महानगरीय प्रहरी परिसर काठमाडौंमा कार्यरत डीएसपी राजकुमार केसीको कोरोना संक्रमणबाट निधन भएको हो ।

दुई हप्ता अगाडि डीएसपी केसीलाई कोरोना संक्रमण पुष्टि भएको थियो । डीएसपी केसीको स्वास्थ्यमा समस्या देखिएपछि तत्कालै उनलाई प्रहरी अस्पतालमा भर्ना गरिएको थियो । उपचारका क्रममा उनको बिहीबार बिहान निधन भएको हो ।

काठमाडौंको कागेश्वरी मनोहरा नगरपालिका मूलपानी स्थायी घर भएका डीएसपी केसी महानगरीय प्रहरी परिसर काठमाडौंमा कार्यरत हुनु अगाडि जिल्ला प्रहरी कार्यालय कास्कीमा कार्यरत थिए ।

डीएसपी केसीका १५ वर्षीया छोरा र श्रीमती छन् । कोरोना संक्रमणपछि डीएसपी केसीले ५ मे मा आफ्नो सामाजिक सञ्जालमा लेखेका थिए, भौतिकरुपमा एकपटक सबैसँग आइसोलेट गराई छाड्यो । भावनात्मक रुपमा चाहिँ हैन है । कोभिड–१९ पोजेटिभ । डीएसपी केसीको निधनसँगै कोरोना संक्रमणबाट ज्यान गुमाउने प्रहरीको संख्या ९ पुगेको छ । प्रहरीमा ज्यान गुमाउने डीएसपी केसी उच्च अधिकारी हुन् ।

छोरा र श्रीमतीका साथमा डीएसपी केसी ।