पोखरा । बाल यौन दुराचारको अभियोगमा पोखरामा अमेरिकी नागरिक मंगलबार (हिजो) पक्राउ परेका छन् । पोखरा वडा नं. १८ सेदीस्थित एक होमस्टेबाट ६६ वर्षीय अमेरिकी नागरिक माइल नरम्यान टेलरलाई प्रहरी प्रधान कार्यालय केन्द्रीय अनुसन्धान ब्युरोको टोलीले पक्राउ गरेको हो ।

क्यालिफोर्निया निवासी माइलले अमेरिकामा रहँदैदेखि नेपालका बालबालिकासँग नियमित सम्पर्कमा रहेको प्रहरी उपरीक्षक एवं अनुसन्धान ब्युरोका प्रवक्ता गंगा पन्तले जारी गरेको विज्ञप्तिमा उल्लेख छ । पक्राउ परेका अमेरिकी नागरिक माइललाई बालयौन दुरुपयोग गरेको कसुरमा आवश्यक अनुसन्धान गरी कारवाही गर्नका लागि जिल्ला प्रहरी कार्यालय कास्कीमा ब्युरोले बुझाएको छ ।

अमेरिकी नागरिक माइकल सन् २०१८, २०१९ र २०२१ गरी तीनपटक नेपाल आएको देखिन्छ । अमेरिकी नागरिक माइकल विरुद्ध ३ जना बालबालिकालाई बालयौन दुराचार गरेको आरोपमा पीडित बालक एवं अभिभावकहरुबाट जिल्ला प्रहरी कार्यालय कास्कीमा जाहेरी दरखास्त परेको थियो । प्रहरीले माइकलको साथबाट केही अमेरिकी डलर र ल्यापटप बरामद गरेको छ ।