सप्तरी । महिलामाथि यौन दुर्व्यवहार गरेको आरोपमा प्रहरीले राजविराजस्थित छिन्नमस्ता अस्पतालमा कार्यरत डा राजन जैसवाललाई शुक्रबार पक्राउ गरेको छ । २५ वर्षीया महिलालाई उपचारका बहानामा श्रीमानलाई औषधी किन्न पठाई ती डाक्टरले क्याबिनमा अश्लिल हर्कत गरेको पीडितको आरोप छ ।

सोही अस्पतालमा बच्चा जन्माएकी नन्दकी छोरीलाई उपचार गराउन पुगेकी ती महिलासँग अस्पताल कै क्याबिनमा डा जैसवालले यौनजन्य दुर्व्यवहार गरको उजुरी पछि पक्राउ गरिएको जिल्ला प्रहरी कार्यालय सप्तरीका प्रहरी उपरीक्षक राजेन्द्रप्रसाद धमलाले जानकारी दिए ।

डिस्चार्ज भएर घर फर्किने बेलामा सल्लाहका लागि शिशुसहित एकपटक भेट्नु भनेर डा जैसवालले भनेका थिए । सोही अनुसार डा जैसवाललाई भेट्न पुगेकी महिलालाई बालिका जाँच्ने बहानामा आफ्नो पेट सुम्सुम्याएको, संवेदनशील अङ्ग छुनुका साथै चलाएको र अन्तमा ब्लाउजको टाँक नै खोलेर अश्लिल क्रियाकलाप गर्न लागेपछि प्रतिकार गरेको प्रहरी सामु बताएकी छिन् ।

डिस्चार्ज भईसकेपछि केही औषधि लेखेर डा जैसवालले पीडितका पतिलाई औषधि पसल पठाएर केबिन भित्र ती महिलालाई अश्लिल क्रियाकलाप गरेपछि प्रतिकार गर्दा विरामीका कुरुवा र स्वास्थ्यकर्मी जम्मा भई अस्पतालमा नै होहल्ला भएको थियो । यस घटना लगत्तै अस्पताल प्रशासनले डा. जैसवाललाई एक प्रेस विज्ञप्ति नै जारी गरेर निलम्बन गरेको अस्पतालका प्रशासक राजेश झाले जानकारी दिए ।

यस विषयमा डा जैसवालले आफूले शिशुलाई स्तनपान गराउने तरिका सिकाउन खोजेको तर कुनै पनि गलत नियत नभएको दावी गर्दै आईरहेका छन् । यस विषयमा प्रहरीले चिकित्सक जैसवलालको हिरासतमा नै राखेर अनुसन्धान गरिरहेको छ ।