पोखरा, ९ वैशाख । पोखरा महानगरपालिका वडा नम्बर २४ का वडाध्यक्ष भरतबहादुर अधिकारीलाई जातीय भेदभाव तथा छुवाछुत मुद्दामा ४ महिना १५ दिन कैद सजाय हुने जिल्ला अदालत कास्कीको फैसला उच्च अदालत पोखराले सदर गरिदिएको छ।

उच्च अदालतका न्यायाधीश द्वय अन्जु उप्रेती ढकाल र मेरिना श्रेष्ठको संयुक्त इजलासले कास्की जिल्ला अदालतले यसअघि गरेको कैद र जरिवानाको फैसलालाई सदर गर्ने आदेश दिएको हो। उच्च अदालतले पनि अधिकारीलाई दोषी ठहर गर्दै जिल्ला अदालतको फैसला कायम राखेको छ।

के थियो घटना?
२०७९ साल पुस १८ गते पोखरा महानगरपालिका वडा नम्बर २४ को वडा कार्यालयमा लक्षित वर्गको बजेट र सीपमूलक तालिमको विषयमा छलफल भइरहेको थियो। सोही क्रममा वडा अध्यक्ष भरतबहादुर अधिकारी र सोही वडाकी दलित महिला सदस्य मैया नेपालीबीच विवाद उत्पन्न भएको थियो।

विवादका क्रममा अध्यक्ष अधिकारीले मैया नेपालीलाई जातीय विभेद हुने गरी अपमानजनक र अमानवीय शब्द प्रयोग गर्दै गाली गलौज गरेका थिए।

त्यसपछि मैया नेपालीले आफूमाथि भएको दुव्र्यवहार र जातीय विभेदविरुद्ध कास्की जिल्ला अदालतमा मुद्दा दायर गरेकी थिइन्। २०८० मंसिर ७ गते कास्की जिल्ला अदालतकी न्यायाधीश अवनी मैनाली भट्टराईको इजलासले अधिकारीलाई दोषी ठहर गर्दै जातीय तथा अन्य सामाजिक छुवाछुत र भेदभाव (कसूर र सजाय) ऐन, २०६८ बमोजिम ४ महिना १५ दिन कैद, ७५ हजार रुपैयाँ जरिवाना र पीडित नेपालीलाई १० हजार रुपैयाँ क्षतिपूर्ति भराउने फैसला गरेको थियो।

जिल्ला अदालतको उक्त फैसलाविरुद्ध वडा अध्यक्ष अधिकारीले उच्च अदालतमा पुनरावेदन गरेका थिए। तर उच्च अदालतले पनि उनलाई दोषी नै ठहर गर्दै जिल्ला अदालतको फैसला सदर गरेको छ। अधिकारी २०७९ वैशाखमा सम्पन्न स्थानीय निर्वाचनमा नेपाली कांग्रेसबाट वडाध्यक्षमा निर्वाचित भएका हुन्।