पोखरा, २७ चैत । पोखराको बीच बजारमा साँझपख धारिलो हतियार प्रहार गरी एकल महिला सिर्जना पौडेल केसीको ज्यान लिने घटनामा संलग्न भाञ्जा नाता पर्ने अभियुक्तसहित दुई जनालाई प्रहरीले पक्राउ गरेको छ । पारिवारिक अंश विवाद र कलह नै हत्याको मुख्य कारण रहेको प्रारम्भिक अनुसन्धानबाट खुलेको छ ।

मिति २०८२ चैत २५ गते साँझ ७ः१५ बजे पोखरा महानगरपालिका वडा नं. ८ सभागृह चोक नजिक शिवालय चोकस्थित पोखरा–बाग्लुङ सडक खण्डमा अपरिचित व्यक्तिले धारिलो हतियार (खुडा) प्रहार गरी सिर्जनालाई घाइते बनाएको थियो । घाइतेलाई तत्काल गण्डकी मेडिकल कलेज पुर्‍याइए पनि राति ८ः१८ बजे चिकित्सकले मृत घोषणा गरेका थिए । ४२ वर्षीया मृतक सृजना पोखरा–५ जीरो किमी घर भई हाल पोखरा–१८ सेदी बस्दै आएकी  थिइन् । उनको टाउकोमा प्रहार गर्दा टाउकाको भित्री भागसमेत बाहिर निस्कने गरी विभत्स आक्रमण भएको प्रहरीले जनाएको छ ।

पारिवारिक पृष्ठभूमि : कलहको बीउ
सृजना ‘खसी किन्ने किस्ने’को नामले चिनिने मासु व्यापारी कृष्ण क्षेत्रीकी दोस्रो श्रीमती थिइन् । कृष्णकी पहिलो श्रीमतीको निधनपछि ९ वर्षअघि सृजनासँग विवाह भएको थियो । कृष्णको ३ वर्षअघि निधन भएपछि सृजना ४ वर्षीया छोरीसहित एक्लै जीवन गुजार्दै थिइन् । कृष्णको पहिलो श्रीमतीबाट एक छोरा र दुई छोरी छन् । छोरा लागूऔषध मुद्दामा कास्की जिल्ला कारागारमा थुनामा छन् ।

अदालतबाट बकसपत्र सम्बन्धी मुद्दामा सृजनाकै पक्षमा फैसला भएपछि परिवारभित्र अंश र सम्पत्तिको विवाद चर्किएको थियो । प्रहरी अनुसन्धानअनुसार यो नै हत्याको मुख्य कारण हो । सृजना पसल बन्द गरेर पैदल घर फर्किँदै गर्दा पछाडिबाट आक्रमण भएको थियो ।

अनुसन्धान र पक्राउ
जिल्ला प्रहरी कार्यालय कास्की, गण्डकी प्रदेश प्रहरी कार्यालय र मातहतका वडा प्रहरी कार्यालयको संयुक्त टोलीले तीव्र अनुसन्धान गर्दै घटनास्थल नजिकैका सीसीटीभी फुटेज, पारिवारिक पृष्ठभूमि र प्रमाण संकलन गरेर अभियुक्तसम्म पुगेको हो ।

पक्राउ पर्नेमा : सन्तोष भन्ने शिशिर के.सी. (२७ वर्ष) ः पर्वत कुश्मा नगरपालिका–११ शिल्मी घर भई हाल पोखरा–६ मा डेरा बस्ने । घटना भएको दिन रुपन्देही बुटवल–२ मनकामना टोलबाट पक्राउ । उनको अभद्र व्यवहार, चोरी तथा डाँका मुद्दामा पहिले नै रेकर्ड छ ।
कुशल परियार (३२ वर्ष) : पोखरा–१७ रातोपहिरा बस्ने । लागूऔषध मुद्दामा दोहोर्‍याई–तेह्र्‍याई पक्राउ परिसकेका ।

शिशिरले खुडा प्रहार गरेको र कुशलले स्कुटरमा लगेर भगाउने मतियारको भूमिका खेलेको प्रहरीले जनाएको छ । घटनामा प्रयोग भएको ग २५ प ३०४४ नम्बरको स्कुटर पोखरा–७ मुस्ताङ चोकबाट र रगत लागेको खुडा पोखरा–१६ बिरौटा तितेपानी जङ्गलबाट बरामद भएको छ । अभियुक्तहरूले मास्क, हेल्मेट लगाएर स्कुटरको नम्बर प्लेट छोपेर घटना गरेको सीसीटीभी फुटेजमा देखिन्छ । उनीहरू दिउँसैदेखि सृजनाको पसल वरिपरि घुमेर पिछा गरिरहेका थिए ।

कानुनी कारबाही
दुवै अभियुक्तलाई कर्तव्य ज्यान सम्बन्धी कसुरमा मुद्दा दर्ता गरी जिल्ला अदालत कास्कीबाट म्याद थपेर अनुसन्धान अघि बढाइएको छ । घटनासँग जोडिएका अन्य मतियार वा सहयोगी छन् कि भन्ने विषयमा थप अनुसन्धान जारी छ ।  मुलुकी अपराध संहिता २०७४ को परिच्छेद १२ अनुसार ज्यान सम्बन्धी कसुरमा मुद्दा चलेको छ ।

प्रहरीको भनाइ
जिल्ला प्रहरी कार्यालय कास्कीले शुक्रबार पत्रकार सम्मेलन गरी यो जानकारी दिएको हो । प्रहरीले पारिवारिक कलह र अंश मुद्दालाई मुख्य कारण मानेको छ भने थप अनुसन्धानबाट घटनाको पूर्ण चित्र सार्वजनिक हुने जनाएको छ ।

एक सानो छोरीकी आमा, एक्लै व्यवसाय गर्दै जीवन गुजारिरहेकी सृजनाको यस्तो विभत्स हत्याले पोखराको सुरक्षा व्यवस्थामाथि समेत गम्भीर प्रश्न खडा गरेको छ । प्रहरीले घटना भएको ४८ घण्टाभित्रै मुख्य अभियुक्त पक्राउ गर्न सफल भएको छ ।

यो घटनाले पारिवारिक कलहले कसरी एउटा निर्दोष महिलाको ज्यान लिन सक्छ भन्ने कुरा फेरि एक पटक उजागर गरेको छ । सृजनाको ४ वर्षीया छोरी अब आमाविहीन भएको छ । प्रहरीले थप प्रमाण र योजनाका अन्य व्यक्ति छन् कि भन्ने विषयमा अनुसन्धानलाई तीव्रता दिएको छ ।