काठमाडौँ, २१ चैत । राजनीतिक संरक्षणको बलियो छत्रछाया ओढेर वर्षौंसम्म जोगिँदै आएका ठूला व्यापारिक घरानाका ठगहरू अब कानुनको फन्दामा परिरहेका छन् । व्यापारिक घराना शंकर ग्रुपका अध्यक्ष शंकरलाल अग्रवाल सम्पत्ति शुद्धीकरणसम्बन्धी कसुरमा शुक्रबार पक्राउ परेका छन् ।

इन्फिनिटी होल्डिङ्सका प्रमुख दीपक भट्टलाई बिहीबार पक्राउ गरेको भोलिपल्ट नै अग्रवाललाई सम्पत्ति शुद्धीकरण अनुसन्धान विभागको निर्देशनमा प्रहरीले नियन्त्रणमा लिएको हो ।

अग्रवाललाई जिल्ला प्रहरी परिसर ललितपुरको हिरासतमा राखिएको छ । विभाग र प्रहरी दुवैले पक्राउबारे औपचारिक प्रतिक्रिया दिन अस्वीकार गरेका छन् । ‘अनुसन्धान भइरहेको विषय हो, धेरै बोल्न मिल्दैन,’ सम्बद्ध अधिकारीहरूले भने ।

यो पक्राउ नेपाल राष्ट्र बैंकले साढे दुई वर्षअघि नै औँल्याएको शंकास्पद कारोबारसँग जोडिएको छ । राष्ट्र बैंकले इन्फिनिटी होल्डिङ्स र शंकर ग्रुपबीच भएको करोडौंको आर्थिक लेनदेनबारे अनुसन्धान गर्न विभागलाई पत्र पठाएको थियो । विभागले २०७९ पुसमा दीपक भट्टसँग प्रारम्भिक बयान लिए पनि सामान्य छानबिनमै सीमित रही मुद्दा नचलाउने निर्णय गर्दै उजुरी फिर्ता गरेको थियो । तर रास्वपाका वरिष्ठ नेता वालेन्द्र शाह प्रधानमन्त्री बनेपछि पुरानो फाइल ब्युँताएर अनुसन्धान तीव्र पारिएको छ ।

अनुसन्धानका क्रममा २०७७ देखि २०७९/८० को बीचमा दुवै पक्षबीच भएको विभिन्न शंकास्पद कारोबार बाहिरिएको छ । जलविद्युत्, बिमा, लघुवित्त, ट्राभल, शैक्षिक संस्था, सार्वजनिक ठेक्का, हातहतियार उत्पादन र रियल इस्टेट क्षेत्रमा लगानी गरेका भट्ट र शंकर ग्रुपबीच ठूलो रकमको अनियमित लेनदेन देखिएको छ ।

विशेष गरी २०७९/८० को बजेट निर्माणमा भट्टको सक्रियतामा शंकर ग्रुपलाई फाइदा पुग्ने गरी कर दर हेरफेर गराएको र २०७८/७९ को पूरक बजेटमा पनि शंकर ग्रुपलाई कर छुट दिलाउन भूमिका खेलेको आरोप लागेको छ । त्यतिबेला तत्कालीन अर्थमन्त्री जनार्दन शर्माको भूमिका पनि शंकाको घेरामा परेको थियो ।

बैंकिङ कारोबारमा पनि गम्भीर अनियमितता देखिएको छ । सिद्धार्थ बैंकमा भट्टको खातामा जगदम्बा स्टिल (शंकर ग्रुपको कम्पनी) बाट ४५ करोड रुपैयाँ ट्रान्सफर भएको, ओभरड्राफ्ट खाताबाट ५० लाख सीमाभन्दा बढी रकम निकालिएको र सीमा बढाएर ठूलो कारोबार गरिएको तथ्य फेला परेको छ । यी कारोबारको वैध स्रोत पुष्टि नभएपछि नै अनुसन्धान अघि बढाइएको हो ।

विगतमा सत्ता–शक्तिको आड लिएर अनुसन्धान रोक्न सफल भएको आरोप लागेका यी दुवै पक्षमाथि अब कडा छानबिन भइरहेको छ । शंकर ग्रुप र भट्ट मात्र होइनन्, उनीहरूलाई राजनीतिक संरक्षण दिएको आरोप लागेका पूर्वप्रधानमन्त्री शेरबहादुर देउवा, केपी शर्मा ओली र पुष्पकमल दाहालसमेत सम्पत्ति शुद्धीकरण अनुसन्धानमा तानिएका छन् । यसै प्रकरणमा पूर्वमन्त्री दीपक खड्कालाई पनि पक्राउ गरी अनुसन्धान भइरहेको छ । शंकर ग्रुपका अन्य सञ्चालक पनि अनुसन्धानको दायरामा छन् ।

शंकर ग्रुपका अध्यक्ष शंकरलाल अग्रवाल र इन्फिनिटी होल्डिङ्सका प्रमुख दीपक भट्ट ।

यी दुवै समूहले बिमा प्राधिकरण, धितोपत्र बोर्डमा आफ्ना मान्छे घुसाउने, कानुन आफ्नो अनुकूल बनाउने र स्वार्थ बाझिने नीतिगत हस्तक्षेप गर्ने गरेको आरोप पनि छ । भट्ट र अग्रवाल दुवैको हिमालय रि–इन्स्योरेन्समा साझेदारी रहेको छ । शंकर ग्रुप जगदम्बा स्टिल, जगदम्बा मोटर्स, रिद्धिसिद्धि सिमेन्ट, युनियन लाइफ इन्स्योरेन्स, विभिन्न जलविद्युत् आयोजना र रियल इस्टेटमा सक्रिय छ ।

पछिल्लो समय राजनीतिक संरक्षण कमजोर हुँदै गएपछि ठूला ठगहरू कानुनको दायरामा आउन थालेका छन् । शंकर अग्रवालको पक्राउ यसैको पछिल्लो कडी हो । अनुसन्धानले कति टाढासम्म पुग्छ र क–कसलाई छुन्छ, अब त्यो हेर्न बाँकी छ ।