पोखरा, १३ चैत । जग्गा खरिद–बिक्री सम्बन्धी विवादमा सामाजिक सञ्जालमार्फत चरित्र हत्या गरेको आरोपमा कास्की जिल्ला प्रहरी कार्यालयले पोखरा–५, मालेपाटन घर भएका ७० वर्षीय छवि सुवेदी ‘विजय’ भनेर चिनिने छविलाल सुवेदीलाई पक्राउ गरेको छ । छविलाल पर्वत जिल्लाको कुश्मा १२, ठुलीपोखरीका स्थायीवासिन्दा हुन् । उनले त्यहाँ पनि धेरै मानिसहरुलाई पीडित बनाएका छन् ।

पोखरा महानगरपालिका वडा नं. ५ की पार्वती कुमारी शर्माले दिएको जाहेरीका आधारमा प्रहरीले सुवेदीलाई विद्युतीय कारोबार ऐनअन्तर्गत पक्राउ गरेको हो । सुवेदीले आफूले बेचिसकेको जग्गामा पुनः दाबी गर्दै सामाजिक सञ्जाल, युट्युब र अन्य माध्यमबाट निरन्तर भ्रामक प्रचार गरी पार्वती (पीडित)लाई मानसिक तथा सामाजिक यातना दिइरहेको आरोप छ ।

२०७१ भदौं २४ गते छविलाल सुवेदीले पोखरा महानगरपालिका वडा नं. १८ मा रहेको कि.नं. ४४५ र ४४७ का दुई कित्ता जग्गा पार्वती कुमारी शर्मालाई मालपोत कार्यालय कास्कीबाट कानुनी रूपमा बिक्री गरेका थिए । जग्गा बिक्री भएको १ १ वर्षपछि सुवेदीले विभिन्न कानुनी उपचार खोज्दै अदालतसम्म पुगे पनि सर्वोच्च अदालतबाट समेत हार बेहोरेका थिए । त्यसपछि पनि उनले जग्गा हडप्ने प्रयासस्वरूप विभिन्न संघसंस्थाका नाममा ब्यानर तथा झण्डा गाड्ने, फोन मार्फत धम्की दिने जस्ता गतिविधि गर्दै आईरहेका थिए ।

पछिल्लो समय पार्वती शर्माले उक्त जग्गा बेच्न खोज्दा छविलाल सुवेदी र उनकी श्रीमती लक्ष्मी सुवेदीले फेसबुक म्यासेन्जर, आफ्नो युट्युब च्यानल र अन्य सामाजिक सञ्जालमा ‘जग्गा किन्न आएमा रकम डुब्छ, फसिन्छ’ जस्ता भ्रामक सन्देश फैलाएर खरिदकर्ताहरूलाई भड्काएको र पार्वती शर्माको चरित्र हत्या गरेको जाहेरीमा उल्लेख छ । यसले गर्दा आफूलाई मानसिक रुपमा विक्षिप्त र सामाजिक रूपमा बदनाम हुन पुगेको पार्वतीले बताईन् ।

पार्वतीले जिल्ला प्रहरी कार्यालयमा विद्युतीय कारोबार ऐन, २०६३ को दफा ४७, ४८ र ४९ बमोजिम जाहेरी दर्ता गरेकी छिन् । जाहेरीमा उनले दोषीहरूलाई कानुनबमोजिम हदैसम्मको सजाय तथा क्षतिपूर्ति दिलाई पाउँ भनी माग गरेकी छन् । प्रहरीले जाहेरीको आधारमा अनुसन्धान गर्दै छविलाललाई ९ दिन अघि यहीं चैत ४ गते पक्राउ गरेको हो ।

छविलाल सुवेदीलाई स्थानीय स्तरमा मिटरब्याज (अनुचित लेनदेन) र ठगी धन्दामा संलग्न रहेको आरोप लाग्दै आएको छ । पार्वती शर्माको जाहेरीपछि अन्य पीडितहरू पनि प्रहरी कार्यालय पुगेर आफू ठगिएको गुनासो गर्न थालेका छन् । ती पीडितहरूले सुवेदीबाट ठगिएका थप घटनाहरूको सत्यतथ्य बाहिर ल्याई कारबाही गर्न माग गरेका छन् । प्रहरीले घटनाको थप अनुसन्धान जारी राखेको छ । यो घटना जग्गा विवादलाई लिएर सामाजिक सञ्जालको दुरुपयोग भएको एक उदाहरण बनेको छ ।