पोखरा, २८ फागुन । प्रतिनिधिसभा सदस्य महावीर पुनमाथि अभद्र व्यवहार गरेको आरोपमा प्रहरीले एक जनालाई पक्राउ गरेको छ। पोखरा महानगरपालिका–१३, बाँझापाटन घर भएका ४३ वर्षीय विकास गुरुङलाई बिहीबार प्रहरीले महेन्द्रपुल क्षेत्रबाट नियन्त्रणमा लिएको हो।

गत फागुन २५ गते पोखराको पृथ्वीचोकमा महावीर पुन र उनको टोलीले आफ्नो जीवनीमा आधारित पुस्तक ‘महावीर पुनः सम्झना, सपना र अविरल यात्रा’ बिक्री गरिरहेका बेला गुरुङले अपशब्द प्रयोग गर्दै दुव्र्यवहार गरेका थिए। उक्त घटनाको भिडियो सामाजिक सञ्जालमा भाइरल भएपछि प्रहरीले घटनाको सूक्ष्म अनुसन्धान सुरु गरेको थियो।

तस्विर साभार : राजिव कार्की

जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक (डीएसपी) हरिबहादुर बस्नेतका अनुसार, पक्राउ परेका गुरुङको आपराधिक पृष्ठभूमि पनि रहेको खुलेको छ। प्रहरी अभिलेखअनुसार उनी यसअघि तीनपटक लागूऔषधसम्बन्धी मुद्दामा सजाय भुक्तानी गरिसकेका व्यक्ति हुन्।

घटनाको विवरणअनुसार, गुरुङले पुनसँग कुरा गर्न खोज्दा धकेलिएपछि रिसाउँदै भनेका थिए, “सांसद भएर किन किताब बेचेको? कानुन बनाउन जानुपर्दैन र?” यसरी अभद्र व्यवहार गरेका उनलाई प्रहरीले अभद्र व्यवहारसम्बन्धी मुद्दामा अनुसन्धान अगाडि बढाएको छ।

महावीर पुनले विगत केही दिनयता पोखराका विभिन्न चोकमा बसेर आफ्नो पुस्तक बिक्री गर्दै आएका छन्। घटनापछि सामाजिक सञ्जालमा यो विषयले निकै चर्चा पाएको थियो । लगत्तै प्रहरीले अभद्र व्यवहार गर्ने पात्रको खोजिगरिरहेको थियो ।

त्यसदिन भएको घटनाका विषयमा युट्युवर राजिव कार्कीले युट्युवमा राखेको भिडियो हामीले यहाँ साभार गरेका छौं ।