धादिङ, ११ फागुन । पृथ्वी राजमार्गअन्तर्गत धादिङको बेनीघाट रोराङ गाउँपालिका–५, भैंसीगौडा नजिकै सोमबार बिहान भएको बस दुर्घटनामा ज्यान गुमाउनेको संख्या १९ पुगेको छ। पोखराबाट काठमाडौंतर्फ आउँदै गरेको ग २ ख १४२१ नम्बरको यात्रुवाहक बस अनियन्त्रित भई सडकबाट करिब २०० मिटर तल त्रिशुली नदी किनारमा खसेको थियो।

जिल्ला प्रहरी कार्यालय धादिङका अनुसार कुल १९ मृतकमध्ये ९ जनाको सनाखत भएको छ। पहिचान खुलेकाहरूमा एक विदेशी नागरिकसहित निम्नानुसार छन् :

स्टेवार्ट डोमिनिक इथान (२४ वर्षीय बेलायती नागरिक)
विवेक बास्तोला (करीब ४० वर्षीय, कास्की पोखरा महानगरपालिका–३०)
चन्द्रबहादुर कुँवर (६३ वर्षीय, स्याङ्जा वालिङ घर भई हाल काठमाडौं नागार्जुन बस्ने)
ओम कुमार मल्ल (४० वर्षीय, तनहुँ व्यास नगरपालिका–४)
इन्जिनियर ठकुरी (३० वर्षीय, धादिङ त्रिपुरासुन्दरी गाउँपालिका–४)
विष्णुमाया ढकाल (५५ वर्षीया, तनहुँ शुक्लागण्डकी नगरपालिका–७)
लोपसाङ गोले (४२ वर्षीय, काठमाडौं बौद्ध टुसाल)
हरिप्रसाद सिग्देल (४५ वर्षीय, तनहुँ भिमाद नगरपालिका–६)
नविन श्रेष्ठ (५५ वर्षीय, पाल्पा तानसेन नगरपालिका–२)

बाँकी १० मृतक (७ पुरुष र ३ महिला)को पहिचान अझै खुलेको छैन। तीमध्ये एक पुरुषको काठमाडौंको राष्ट्रिय ट्रमा सेन्टरमा उपचारका क्रममा मृत्यु भएको थियो।

बसमा चालकसहित २९ पुरुष र १५ महिला गरी कुल ४४ जना सवार थिए। दुर्घटना राति करिब १:१५ बजे भएको थियो। नेपाल प्रहरी, नेपाली सेना, सशस्त्र प्रहरी बलको विपद् व्यवस्थापन टोली र स्थानीयको सहयोगमा उद्धार कार्य तत्काल सुरु गरिएको थियो।

दुर्घटनामा घाइते भएका २५ जनाको विभिन्न अस्पतालमा उपचार भइरहेको छ। सुरुमा मलेखु, टिचिङ अस्पताल मलेखु र धादिङबेंसी अस्पतालमा राखिएका घाइतेहरूमध्ये गम्भीर अवस्थाका १४ जनालाई राष्ट्रिय ट्रमा सेन्टर काठमाडौं, १० जनालाई नेशनल मेडिकल कलेज कलंकी र १ जनालाई टिचिङ अस्पताल मलेखुमा राखिएको छ। जिल्ला प्रहरी कार्यालय धादिङले घटनाको सूक्ष्म अनुसन्धान जारी राखेको जनाएको छ।