काठमाडौं, १४ कात्तिक । भदौं २४ गते जेन-जी आन्दोलनका क्रममा सुरक्षाकर्मीबाट लुटिएको पेस्तोल र गोली बेचबिखन गरेको आरोपमा प्रहरीले पाँच जनालाई पक्राउ गरेको छ। स्वयम्भू प्रहरीले गोप्य सूचना पाएपछि खटिएको टोलीले उनीहरूको साथबाट एक थान पेस्तोल, एउटा म्यागजिन र पन्ध्र राउन्ड गोली बरामद गरेको जिल्ला प्रहरी परिसर काठमाडौंले प्रेसित इमेलमा उल्लेख छ ।

पक्राउ पर्नेमा धादिङको धुनिबेशी गाउँपालिका घर भई काठमाडौं–१५ को ट्राफिक बिट नजिक चरा पसलमा काम गर्ने २१ वर्षीय कृष्ण गुरुङ छन्। उनी प्रदर्शनका बेला पेस्तोल लुट्न संलग्न भएको प्रहरीको भनाइ छ।

त्यसैगरी काठमाडौं–१५ भगवापाउँ जर्मन क्वाटर बस्ने २५ वर्षीय राजन देउला, ट्राफिक कार्यालय नजिक डेरा गरेर बस्ने भारतको मोतिहारी सितामणीका २४ वर्षीय अकबर खान र बिजेश्वरी रिट्रीट अपार्टमेन्ट नजिक बस्ने २६ वर्षीय सुमिन शाक्य हतियार किन्ने र बेच्ने काममा संलग्न थिए।

यसैगरी बानेश्वर घर भई क्षेत्रपाटी चोकमा कपडा पसल चलाउने ३८ वर्षीय प्रभात मल्लले पनि उक्त पेस्तोल किनेको खुलेको छ। सबैलाई काठमाडौं जिल्ला अदालतले छ दिनको म्याद थपेर हातहतियार तथा खरखजाना मुद्दामा अनुसन्धान गरिरहेको प्रहरीले जनाएको छ।