पोखरा, २९ असोज । स्वरूप परिवर्तन गरिएका मोटरसाइकलले चर्को आवाज निकालेर ध्वनि प्रदूषण र सामाजिक आतंक मच्चाउने गतिविधि बढेको जनगुनासोपछि जिल्ला प्रहरी कार्यालय कास्कीले विशेष अभियान “अपरेशन ३६५” सञ्चालन गरेको छ ।

जिल्ला प्रहरी कार्यालय कास्की र मातहतका युनिटबाट एकसाथ प्रहरी परिचालन गरी रातको समयमा होहल्ला गर्ने, मोटरसाइकलको स्वरूप परिवर्तन गरी चर्को आवाज निकाल्ने, शान्ति–सुव्यवस्था खलल पार्ने र नियन्त्रणमा लिन खोज्दा प्रहरीसँग झै–झगडा गर्ने मोटरसाइकल चालक र सवारी साधनलाई नियन्त्रणमा लिइएको छ । यस्ता सवारी साधन र चालकमाथि कानुनी कारबाही प्रक्रिया अघि बढाइएको जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक हरिबहादुर बस्नेतले बताए ।

यो अभियान निरन्तर सञ्चालन हुने प्रहरीले जनाएको छ । प्रहरीले सवारी साधन धनीहरूलाई मोटरसाइकलको स्वरूप परिवर्तन नगरी मूल अवस्थामा चलाउन र ग्यारेज, वर्कसप तथा रिकन्डिसन हाउस सञ्चालकहरूलाई यस्तो कार्यमा संलग्न नहुन अनुरोध गरेको छ । स्वरूप परिवर्तन गरी सवारी चलाएमा चालक र संलग्न व्यक्तिहरूमाथि कानुनअनुसार कारबाही हुने प्रहरीले चेतावनी दिएको छ ।