पोखरा, १७ भदौं । मानव बेचबिखन तथा ओसारपसार जस्तो जघन्य अपराधमा संलग्न खाजाघरका सञ्चालकलाई प्रहरीले पक्राउ गरेको छ। गोप्य सूचनाको आधारमा सक्रिय भएको जिल्ला प्रहरी कार्यालय कास्कीको टोलीले पोखरा महानगरपालिका वडा नम्बर ३, नालाको मुखमा सञ्चालित सिन्दु खाजाघरका सञ्चालक २३ वर्षीया सिन्धु किसानलाई हत्कडी लगाएको हो।

सिन्धु किसानले बालिकाहरूलाई विभिन्न प्रलोभन देखाएर ललाईफकाई गरी यौन धन्दामा लगाउने गरेको खुलेको छ। पैसा, राम्रो जीवन र अवसरको नाममा उनीहरूलाई फसाउने यो धन्दा लामो समयदेखि चलिरहेको आशंका प्रहरीले गरेको छ ।

प्रहरीले घटनास्थलबाटै उनलाई नियन्त्रणमा लिएपछि सम्मानित कास्की जिल्ला अदालतबाट मानव बेचबिखन तथा ओसारपसार मुद्दामा ५ दिनको म्याद थप गरी थप अनुसन्धान सुरु गरेको जिल्ला प्रहरी कार्यालय कास्कीका सूचना अधिकारी प्रहरी निरीक्षक अविनाश दिप जिसीले जानकारी दिए ।