ललितपुर, २८ साउन । ललितपुरको मितेरी सहकारी ठगी प्रकरणमा नेपाली कांग्रेसका उपसभापति धनराज गुरुङलाई प्रहरीको केन्द्रीय अनुसन्धान ब्यूरो (सीआईबी)ले उन्मुक्ति दिएको छ। अनुसन्धान पूरा गरी सीआईबीले बुधबार जिल्ला सरकारी वकिल कार्यालयमा प्रतिवेदन बुझाएको छ, जसमा ११ जनालाई प्रतिवादी बनाउन सिफारिस गरिएको छ। तर, धनराजलाई पर्याप्त प्रमाण नभेटिएको भन्दै प्रतिवादी बनाउन सुझाइएको छैन।

सीआईबीका एसएसपी होविन्द्र बोगटीका अनुसार, अनुसन्धान प्रतिवेदनमा सहकारीबाट करिब १४ करोड ठगी भएको र सञ्चालकहरूबाट थप साढे ३ करोड ठगी भएको उल्लेख छ। यी रकमको बिगो मागदाबी गर्न सिफारिस गरिएको छ। प्रतिवेदन अध्ययनपछि सरकारी वकिल कार्यालयले ललितपुर जिल्ला अदालतमा मुद्दा दायर गर्नेछ।

सीआईबीले धनराजकी पूर्वपत्नी ज्योति गुरुङसहित ज्योतिबहादुर भण्डारी, सुवास खत्री, सुरेश अधिकारी, प्रकाश थापा, हितमान थापालगायत ११ जनालाई प्रतिवादी बनाउन सुझाएको छ। यसमध्ये भण्डारी, खत्री र अधिकारी पक्राउ परेका छन्। ज्योति गुरुङमार्फत ठगी भएको र भण्डारीले रकम विदेश पु¥याएर क्यासिनोमा लगानी गरेको आरोप छ।

अनुसन्धानमा भण्डारीको समूहले ६ अर्ब ७४ करोडभन्दा बढीको हुन्डी कारोबार र क्रिप्टो मुद्राको कारोबार गरेको पाइएको छ। भण्डारीले थाइल्यान्ड, मलेसिया, भियतनाम हुँदै कम्बोडियामा पुगेर अनलाइन फिसिङमार्फत सहकारीका पदाधिकारीलाई ठगेका थिए। उनले १४ करोड ८१ लाख तिर्ने भन्दै ३३ करोड ११ लाख पठाएको झुटो दाबी गरी थप ३ करोड ४४ लाख ठगी गरेको प्रहरीको भनाइ छ।

भण्डारीले दुई फरक नागरिकता र राहदानी लिएको पाइएको छ। कास्की र बर्दियाबाट लिएका यी कागजातका आधारमा उनलाई ठगी, संगठित अपराध, हुन्डी, क्रिप्टो कारोबार र कीर्ते कसुरमा मुद्दा चलाउन सिफारिस गरिएको छ। यसअघि पनि भण्डारी र खत्री हुन्डी र नक्कली नोट कारोबारमा पक्राउ परेका थिए।

मितेरी सहकारी ठगी प्रकरणमा धनराज गुरुङमाथि कुनै प्रमाण नभेटिएको सीआईबीको दाबी छ। तर, ज्योति गुरुङ र भण्डारीसहितका व्यक्तिहरूले ठूलो रकम ठगी गरी विदेश पु¥याएको र क्यासिनोमा लगानी गरेको अनुसन्धानबाट खुलेको छ। अब सरकारी वकिल कार्यालयले मुद्दा दायरको निर्णय गर्नेछ।