पोखरा, २१ साउन । पोखरा महानगरपालिका वडा नं. १७ बिरौटामा लागूऔषधको कारोबार भइरहेको भन्ने गोप्य सूचनाको आधारमा प्रहरीले तीन जनालाई पक्राउ गरेको छ ।

दुई दिन अघि साउन १९ गते राति पौने ७ बजेको समयमा लागूऔषध नियन्त्रण ब्यूरो शाखा कार्यालय पोखरा र जिल्ला प्रहरी कार्यालय कास्कीको संयुक्त टोलीले खानतलासी गर्दा ठूलो परिमाणमा लागूऔषध बरामद गरेको हो।

पक्राउ पर्नेमा स्याङ्जा स्थायी घर भई हाल पोखरा–१७ बिरौटा घारीकुलो बस्ने ३२ वर्षीया रिना थापा मगर, स्याङ्जा फेदीखोला गाउँपालिका–४ स्थायी घर भई हाल पोखरा–१७ बस्ने ३४ वर्षीय विश्वास गुरुङ र पर्वत स्थायी घर भई हाल पोखरा–१७ बस्ने ३९ वर्षीया मिना थापा मल्ल रहेका छन्।

प्रहरीले उनीहरूको घरकोठा खानतलासी गर्दा एकसय ६६ एम्पुल डाइजापाम, एकसय ६९ एम्पुल फेनेरागन र एकसय ६६ एम्पुल नुर्फिन गरी जम्मा पाँचसय एक एम्पुल लागूऔषध र तीन थान मोबाइल बरामद गरेको छ। पक्राउ परेका तीनै जनालाई कास्की जिल्ला अदालतबाट लागूऔषध सम्बन्धी कसूरमा १० दिनको म्याद थप गरी थप अनुसन्धान भइरहेको जिल्ला प्रहरी कार्यालय कास्कीले जनाएको छ।