पोखरा, ८ असार । पोखरामा प्रहरीले झण्डै डेढ करोड रुपैयाँ बराबरको अवैध सुनसहित दुई जनालाई नियन्त्रणमा लिएको छ । भारतको पञ्जाबदेखि नेपालसम्म तस्करी गरिएको सुनसहित उनीहरूलाई पुम्दीभुम्दीबाट बुटवलतर्फ जाँदै गरेको माइक्रोबसबाट पक्राउ गरिएको हो ।

जिल्ला प्रहरी कार्यालय कास्कीका प्रमुख एसपी श्यामबाबु ओलियाले पत्रकार सम्मेलन गर्दै पक्राउ पर्नेमा भारत पञ्जाब, अमृतसरका ४९ वर्षीय कुलदीप सिंह र रुपन्देही तिलोत्तमा–१६ का ४७ वर्षीय रामबहादुर बिक रहेको जानकारी दिए । उनीहरूलाई विशेष सुराकीको आधारमा खटिएको प्रहरी टोलीले पक्राउ गरेको हो ।

८२ तोला १६ लाल सुन बरामद
प्रहरीले उनीहरूको साथबाट ८२ तोला १६ लाल सुन बरामद गरेको छ, जुन विभिन्न गरगहनाका रूपमा थियो । बरामद गरगहनाको कुल बजार मूल्य १ करोड ३० लाख ४१ हजार ८ रुपैयाँ रहेको प्रहरीको दाबी छ । बरामद गरगहनामा सिक्री, औंठी, झुम्का, जुली, लकेट, मंगलसूत्र र पोतेलगायतका गरगहना छन् ।

कास्की प्रहरीले अवैध रुपमा बेच्न ल्याईएको ८२ तोला १६ लाल सुन बरामद गरेको छ ।

फेसबुकमार्फत ३ वर्षअघि सुरु भएको सम्बन्ध, सुन तस्करीमा परिणत
प्रारम्भिक अनुसन्धान अनुसार कुलदीप सिंह र रामबहादुर बिकबीच फेसबुकमार्फत ३ वर्षअघि चिनजान भएको थियो । भारतका विभिन्न राज्यमा सुनका गहना बिक्री गर्दै आएका कुलदीपले नेपालमा पनि कारोबारी विस्तार गर्ने योजना बनाएका थिए ।

प्रहरीका अनुसार उनले अमृतसरस्थित अमरजित साहूको सुन पसलबाट सुन ल्याएर नेपालमा बिक्री गर्ने तयारी गरेका थिए । सोही योजनाअनुसार कुलदीपसँगै पोखरा आएका रामबहादुरले बिक्रीबाट लाभांश पाउने सर्तमा साथ दिएको बयानमा स्वीकारेका छन् ।

सामाजिक सञ्जालमा अवैध सुन बिक्री गर्ने गिरोह बिच यसरी कुराकानी हुने गर्दथ्र्यो ।

राजस्व अनुसन्धान कार्यालयमा पठाइयो
पक्राउ परेका भारतीय नागरिक कुलदीप सिंह र रुपन्देहीका रामबहादुर बिक दुवैजनालाई बरामद सुनसहित राजस्व अनुसन्धान कार्यालय, बुटवल पठाइएको छ । घटनासम्बन्धी थप अनुसन्धान भइरहेको कास्की प्रहरीका सूचना अधिकारी डीएसपी हरिबहादुर बस्नेतले जानकारी दिए ।

अवैध सुनसहित पक्राउ परेका भारतीय नागरिक कुलदीप सिंह र रुपन्देहीका रामबहादुर बिक ।