पोखरा, २९ जेठ । मोरङदेखि प्रेमी बोलाएर पोखराका एक सुनचाँदी व्यवसायीलाई हनी ट्रयापमा पार्दै रकम बार्गेनिङ गरेको आरोपमा तीनजना पक्राउ परेका छन् ।

पक्राउ पर्नेहरूमा पोखरा महानगरपालिका–१५ टुटुङ्‍गा बस्ने २७ वर्षीया मरियम राई, मोरङको विराटनगर चोक घर भएका ३८ वर्षीय देव लिम्बु र संखुवासभाको सभापोखरी गाउँपालिका–२ का ४० वर्षीय टेकबहादुर सुवेदी रहेका छन् ।

मरियमले आफैंले काम गर्ने सुनचाँदी पसलका सञ्चालकलाई हनी ट्रयाप शैलीमा फसाएर रकम लिने उद्देश्यले थप दुई युवकलाई पोखरा बोलाई योजनावद्ध ढंगले रकम वार्गेनिङ गरेको प्रवक्ता डीएसपी बस्नेतले जानकारी दिए ।

पक्राउ परेका तीनैजना मिलेर हप्ता दिनसम्म पोखरा–६ लेकसाईड स्थित एक होटलमा सुनचाँदी पसल सञ्चालककी श्रीमतीलाई बोलाई श्रीमानलाई फसाई दिने भन्दैं रकम वार्गेनिङ गरिरहेका थिए ।

पक्राउ परेकाहरूविरुद्ध कास्की जिल्ला अदालतबाट आपराधिक लाभको कसुरमा ७ दिनको म्याद लिएर अनुसन्धान अघि बढाइएको जिल्ला प्रहरी कार्यालय कास्कीका प्रवक्ता डीएसपी बस्नेतले जानकारी दिएका छन् ।

पक्राउ परेका मध्य देव मेरियमको प्रेमी रहेको प्रहरी अनुसन्धानबाट खुलेको छ । दुई युवक पोखरा पुगेपछि सुनचाँदी पसल सञ्चालककी श्रीमतीलाई धम्क्याउँदै रकम वार्गेनिङ गरिरहेका थिए । श्रीमानले मेरियमलाई बलात्कार गरेको र जिन्दगीभरलाई पुग्ने सम्पत्ति नदिए मुद्दा मामिला गरेर सडाउने धम्की दिदैं तर्साउने गरेको अडियो रेकर्ड समेत प्रहरीले बरामद गरेको छ ।