पोखरा, २४ जेठ । जिल्ला प्रहरी कार्यालय कास्की, मातहतका निकाय र लागूऔषध नियन्त्रण व्युरो शाखा कार्यालय पोखराको टोलीले विभिन्न ठाउँबाट बिहीबार एकैंदिन पाँचजना लागूऔषध कारोबारीलाई पक्राउ गर्न सफल भएको छ ।

पोखरा–४, नालामुखबाट एकजना, पोखरा–१८, लामागाउँबाट २ जना र पोखरा–५, धारापानीबाट २ जना गरी पाँचजनालाई पक्राउ गरी अनुसन्धान अघि बढाईएको जिल्ला प्रहरी कार्यालय कास्कीका डीएसपी एवम् प्रवक्ता हरिबहादुर बस्नेतले जानकारी दिएका छन् ।

वडा प्रहरुी कार्यालय बगर र सिआरभी बागलुङ बसपार्क (विन्ध्यावासिनी बसापार्क)बाट खटिएको प्रहरी टोलीले पोखरा–४, नालामूखबाट सुनसरी जिल्ला, धरान उपमहानगरपालिका वडा नं. ८ घर भई हाल पोखरा–५, मालेपाटन बस्ने ३५ वर्षीय सुरज सुनारलाई बिहीबार दिउँसो साढे दुईबजेको समयमा पक्राउ गरेको हो ।

सुरजको साथबाट प्रहरीले ट्यापेन्टाडोल ट्याब्लेटहरू १०० एमजी लेखिएको ७५ ट्याब्लेट र ट्यापेन्टाडोल ट्याब्लेटहरू ७५एमजी लेखिएको ८ ट्याब्लेट गरी ८३ ट्याब्लेट र २० हजार रुपैयाँ नगद बरामद गरेको थियो ।

त्यसैगरी, सुकुटीका लागि असाध्यैं परिचित ठाउँ पोखरा–१८, लामागाउँबाट जिल्ला प्रहरी कार्यालय कास्की र लागूऔषध नियन्त्रण व्यूरो शाखा कार्यालय पोखराबाट खटिएको प्रहरी टोलीले लामागाउँ बस्ने ५१ वर्षीय गोरे पुन र सोही ठाउँ बस्ने २७ वर्षीय शंकर घलेलाई बिहीबार नैं पक्राउ गरेको थियो । गोरे र शंकरको साथबाट प्रहरीले ट्यापेन्टाडोल ट्याब्लेट ७५ एमजी लेखिएको एकसय ट्याब्लेट बरामद गरेको थियो ।

त्यसैगरी, पोखरा–५, धारापानीबाट जिल्ला प्रहरी कार्यालय कास्की र लागूऔषध नियन्त्रण व्यूरो शाखा कार्यालय पोखराको टोलीले वागलुङ गलकोट नगरपालिका वडा नं. १ दुधिलामाटी घर भई हाल पोखरा–५, धारापानी बस्ने २० वर्षीय मौसम पुन र अर्चलबोट बस्ने १९ को राज मगरलाई बिहीबार पक्राउ गरेको हो ।

मौसम र राजबाट प्रहरीले ट्यापेन्टाडोल ट्याब्लेट १०० एमजी लेखिएको ९६ ट्याब्लेट, लागूऔषध गाँजा तीनसय ग्राम र मोवाईल दुईथान बरामद गरेको थियो ।

विहीबार पक्राउ परेका पाँचजनालाई जिल्ला अदालत कास्कीबाट लागूऔषध सम्बन्धी मुद्दामा ६ दिन म्याद थप गरी प्रहरीले अनुसन्धान प्रक्रिया अगाडि बढाएको छ । लागूऔषध कारोबारीप्रति आक्रामक बनेको कास्की प्रहरीले पछिल्लो समय विशेष अभियान नैं सञ्चालन गरेर धमाधम पक्राउ र र कारवाही गर्दै आईरहेको छ ।