काठमाडौं, २९ चैत । तीनकुनेमा भएको हिंस्रक प्रदर्शनका मुख्य कमाण्डर दुर्गा प्रसाई भारतबाट पक्राउ परेका छन् । प्रसाईसँगैं पक्राउ परेका उनका बडिगार्ड दीपक खड्कालाई १२ दिन हिरासतमा राखेर अनुसन्धान गर्न जिल्ला अदालत काठमाडौंले अनुमति दिएको छ ।

भारतको आसममा लुकेर बसेका प्रसाईलाई सामाजिक सञ्जालमा आफैंले पोष्ट गरेको आफ्नै भिडियो र मोवाइलको लोकेशनका आधारमा प्रहरीले बिहीबार पक्राउ गर्न सफल भएको थियो । उनले आफ्ना बडीगार्डको मोवाइलबाट एउटा भिडियो बनाउँदैं आफ्नो भनाई राखेर सामाजिक सञ्जालमा पोष्ट गरेका थिए ।

१५ चैतको प्रदर्शनका नाममा हिंसा भड्काएर फरार भएका प्रसाईलाई बिहीबार भारतमा प्रकाउ गरी आज शुक्रबार बिहान उनलाई भद्रपुर ल्याईएको थियो । त्यसपछि उनलाई जहाजबाट काठमाडौं ल्याइएको हो ।

शुक्रबार जिल्ला अदालत काठमाडौंका न्यायाधीश शिशिरराज ढकालको इजलासले राज्यविरुद्धको कसुरमा प्रसाईंमाथि अनुसन्धान गर्न १२ दिनको म्याद दिएको सूचना अधिकारी दीपककुमार श्रेष्ठले जानकारी दिएका छन् ।

चैत १५ गते प्रसाईंले नै भाँडभैलो मच्चाएपछि राजावादीहरूको प्रदर्शन हिंस्रक बनेको थियो । प्रदर्शनका क्रममा एक सञ्चारकर्मीसहित २ जनाको मृत्यु भएको थियो । साथै दर्जनौँ गाडीमा आगजनी र व्यक्तिगत तथा सरकारी सम्पत्तिमा समेत आगजनी भएको थियो ।

सूचना अधिकारी श्रेष्ठका अनुसार प्रसाईं क्यान्सरको बिरामी भएका कारण अदालतले प्रहरीलाई चिकित्सकको परामर्शमा उपचारको प्रबन्ध गर्न अदालतले आदेश दिएको छ।

व्यवसायी प्रसाईंले अगुवाइ गरेर चैत ४ गते राष्ट्रिय पञ्चायतका पूर्व अध्यक्ष राप्रपाका नेता नवराज सुवेदीको नेतृत्वमा राजसंस्था पुनःस्थापनाका लागि संयुक्त जनआन्दोलन समिति गठन गरिएको थियो । सुवेदीले उनै प्रसाईंलाई जनआन्दोलन समितिको कमान्डर पनि घोषणा गरेका थिए ।