पोखरा, ५ भदौं । सूर्यदर्शन बचत तथा ऋण सहकारी संस्था पोखराका पूर्वसचिव अनुज नकर्मीलाई आज जिल्ला अदालत कास्कीको आदेशले पुर्पक्षका लागि कारागार चलान भएका छन् । नकर्मीलाई प्रहरीले भदौं २ गते काठमाडौंको दक्षिणकालीबाट पक्राउ गरेर पोखरा ल्याएको थियो ।

सूर्यदर्शन सहकारीका पूर्वसचिव अनुज नकर्मी ।

न्यायाधीश हरिप्रसाद कोइरालाको इजलासले सहकारी ठगीमा संलग्न नकर्मीलाई पुर्पक्षका लागि थुनामा पठाउने आदेश गरेको हो । पाँचदिन अघि पक्राउ परेका पूर्वसचिव नकर्मीलाई प्रहरीले आइतबार अदालतमा उपस्थित गराएको थियो ।

शिवबहादुर गुरुङ (महेन्द्र भोटे)का साथमा सहकारीका पूर्वसचिव अनुज नकर्मी ।

जीवी राई (गितेन्द्रबाबु)को समूहले सूर्यदर्शन सहकारीमा १८ हजार ७ सय बचतकर्ताको झण्डैं १ अर्ब ३५ करोड रुपैयाँ ठगी गरेका थिए । एकहजार ३७ जनाले प्रहरीमा दिएको जाहेरीका आधारमा सरकारी वकिलको कार्यालयले १ अर्ब ११ करोड ३४ लाख ४३ हजार ४५ रुपैयाँ बिगो रकम जाहेरीवालालाई दिलाउन माग गर्दै मुद्दा दायर गरेको थियो । उक्त ठगीमा संलग्नहरुलाई ८ देखि १० वर्षसम्म कैंद सजायको माग गरिएको छ ।

यो सहकारी ठगी प्रकरणमा शुरुमा १९ जना र पछिल्लो समय २५ जना गरी हालसम्म ४४ जनालाई पक्राउ पुर्जी जारी गरिएको छ । जसमध्ये सहकारीका उपाध्यक्ष कैलाश दर्लामी, कोषाध्यक्ष कुमार रम्तेल, पूर्वसञ्चालक शिवबहादुर गुरुङ (महेन्द्र भोटे), पूर्व सञ्चालक प्रमोद भट्टराई र भविश्वर अर्याल पुर्पक्षका लागि कास्की कारागारमा रहेका छन् ।