स्याङ्जा, २३ असार । स्याङ्जामा पहिरोले घर पुरिँदा तीन जनाको मृत्यु हुनुका साथै पाँचजना घाइते भएका छन् । शनिबार दिउँसो स्याङ्जाको बिरूवा गाउँपालिका–२ लामाखेतस्थित ईश्वरी लम्सालको घर पहिरोले पुरिँदा आश्रय लिईरहेका स्याङ्दी घर भएका तीन जना छिमेकीको मृत्यु भएको हो ।

जिल्ला प्रहरी कार्यालय स्याङ्जाका सूचना अधिकारी डिएसपी इन्द्रबहादुर रानाका अनुसार पहिरोको जोखिम भएर छिमेकीको घरमा बास बसेका सोही वडाको माझकोट बस्ने ६७ वर्षीया हरिमाया शर्मा, ७१ वर्षीय माधव शर्मा र ६५ वर्षीया गुञ्जेश्वरी शर्मा मरासिनीको पहिरोले पुरिएरै मृत्यु हुन पुगेको हो ।

डिएसपी रानाले भने–‘पहिरोले घर पुरिँदा पाँच जना घाइते भएका छन् । घाइतेहरूमा ५३ वर्षीया ईश्वरी लम्साल, ५५ वर्षीय तीर्थ लम्साल, हरि लम्साल, चन्द्रा केसी र रेनुका लम्साल रहेका छन् । उनीहरूको स्थानीय स्वास्थ्य चौकीमा उपचार भइरहेको छ ।’

शनिबार बिहान उनीहरूको घरमाथि पहिरो गएपछि वडाको समन्वयमा प्रहरी सहितको टोलीले हरिमाया, माधव र गुञ्जेश्वरीलाई स्थानान्तरण गरी छिमेकीको घरमा राखिएको विरुवा गाउँपालिका वडा नं. ६ का वडाध्यक्ष कृष्णबहादुर क्षेत्रीले बताए ।

वडाध्यक्ष क्षेत्रीले भने–‘पहिरो आउने सम्भावना नरहेको निश्चय गरेर तीनै जनालाई छिमेकी ईश्वरीको घरमा सारिएको थियो । दुर्भाग्य अकल्पनीय घटना हुन पुग्यो ।’ पहिरोमा पुरिएर मृत्यु हुनेमा माधव र गुञ्जेश्वरी श्रीमान श्रीमती हुन् भने हरिमाया उनीहरूका छिमेकी हुन् । माधवका छोरा र हरिमायाका नाति भने साथीहरुसँग खेल्न बाहिर जाँदा बाँच्न सफल भएका थिए ।

उक्त पहिरोले पुरिएको घरमाथि सामुदायिक वन र तल ज्याग्दी खोला बगिरहेको छ । ज्याग्दी खोलाको कटानले अन्यत्र पनि बाढी पहिरोको जोखिम रहेकोले त्यस्ता ठाउँका बासिन्दाहरूलाई सतर्क रहन प्रहरी प्रशासन र स्थानीय निकायले आग्रह गरेको छ ।