पोखरा, १३ असार । तीनदिनदेखि लगातार परेको वर्षाका कारण पहिरो जाँदा दुई बालबालिकाको मृत्यु हुनुका साथैं एकजना घाईते भएका छन् । पहिरोमा परेर मादी गाउँपालिका र पोखरा–२७ आरुपाटामा दुई बालबालिकाको मृत्यु भएको हो ।

हिजो राती अन्दाजी सवा दुई बजेको समयमा कास्कीको मादी गाउँपालिका वडा नं. ५ चितेपानी घुम्तीस्थित घर पछाडीको ढिस्को खस्न गई कोठामा सुतिरहेका नातिनी र हजुरआमालाई पुरेको थियो । १३ वर्षीय नातिनी आयुस्मा रानाभाटको पहिरोमा पुरी मृत्यु भएको थियो भने ७० वर्षीय लालमाया बन्जारीलाई स्थानीय र ईलाका प्रहरी कार्यालय शिसुवाको टोलीले सकुसल उद्धार गरिएको थियो ।

त्यसैगरी, हिजो राती अन्दाजी ३ बजेको समयमा पोखरा–२७ आरुपाटास्थित हरि सुनारको घरमा वर्षाका कारण माथिबाट पहिरो आई भत्किन पुग्दा ३ वर्षीय छोरा अनमोल सुनारको मृत्यु भएको थियो । बाबु हरि सुनार, उनकी २७ वर्षीय श्रीमती रितु र ९ वर्षकी छोरी अञ्जलीको भने सकुशल उद्धार गरिएको छ । रितुको भने अवस्था गम्भिर रहेको जिल्ला प्रहरी कार्यालय कास्कीले जानकारी दिएको छ ।