पोखरा, १७ वैशाख । कक्षा १२ को परिक्षाको प्रश्नपत्र सार्वजनिक गर्ने कार्यमा संलग्न भएको भन्दैं प्रहरीले दुईजनालाई सोमबार पक्राउ गरेको छ । पोखरा–११ फुलबारीमा रहेको शिवशक्ति माध्यमिक विद्यालयमा सञ्चालन भईरहेको सामाजिक शिक्षा विषयको प्रश्नपत्र विद्युतीय माध्यमबाट बाहिरिएको थियो ।

परिक्षा सञ्चालन भईरहेको अवस्थामा प्रश्नपत्र नै बाहिरिएको सूचनाको आधारमा वडा प्रहरी कार्यालय रामबजार र गण्डकी प्रदेश प्रहरी कार्यालयबाट खटिएको टोलीले पोखरा–११, फुलबारी बस्ने ३९ वर्षीय नारायण बास्तोला र ३७ वर्षीय रामचन्द्र बास्तोलालाई पक्राउ गरेको जिल्ला प्रहरी कार्यालय कास्कीका सूचना अधिकारी प्रहरी नायव उपरिक्षक बसन्तकुमार शर्माले जानकारी दिएका छन् ।

प्रहरीले उनीहरुको साथबाट कक्षा १२ को थप उत्तर पुस्तिका ८ थान र मोवाईल ३ थानसहित पक्राउ गरेको छ । पक्राउ परेका दुईज्नालाई शिक्षा ऐन २०२८ अन्तर्गतको कसुरमा जिल्ला अदालत कास्कीबाट हिरासतमा राख्ने अनुमति लिई थप अनुसन्धान एवम् कारवाही अघि बढाएको छ ।