विभिन्न च्यानल मिलाएर पोखरामा बषौंदेखि सञ्चालन भईरहेको हुण्डी कारोबारीहरुलाई भने प्रहरीले आजसम्म कारवाही गरेको छैन ।

पोखरा, २ फागुन । जिल्ला प्रहरी कार्यालय कास्कीले स्रोत नखुलेको ५ केजी सुन, ६ केजी चाँदी र ६२ लाख रुपैयाँ नगदसहित पोखरा वडा नं. २ मोहरिया टोलबाट एक भारतीय नागरिकलाई मंगलबार पक्राउ गरेको छ ।

भारत पश्चिम बंगाल मेदिनिपुर दासपुर–११ घर भई हाल पोखरामा बस्दै आएका ४० वर्षीय सुरजित भौमिकको साथबाट उक्त सुन, चाँदी र नगद बरामद गरेको हो । मोहरिया टोलमा घर भाडामा लिई अवैध सुन ल्याई विभिन्न गरगहना बनाई बेचबिखन तथा कारोबार गर्ने गरेको गोप्य सूचनाको आधारमा प्रहरीले माघ २९ गते (२ दिनअघि) साँझ ६ः४० देखि विहान ४ः३० सम्म खानतलासी गर्दा उक्त परिमाणमा सुन, चाँदी र नगद भेटिएको हो ।

भाडामा लिएको घरका विभिन्न कोठामा लुकाई छिपाई राखेको अवस्थामा प्रहरीले विभिन्न किसिमका सुनका गरगहना ५ केजी दुईसय ग्राम, काँचो सुन ९ सय ९९ ग्रामको एक ढिक्का (विस्कुट) १ थान, ५० ग्रामको १ ढिक्का (विस्कुट) १ थान, चाँदी ६ केजी र नगद ६२ लाख ८१ हजार रुपैयाँ बरामद गरेको प्रहरी प्रमुख एसपी मोहनकुमार थापाले जानकारी दिए ।

प्रहरीले सुरजितको कोठाबाट मोवाईल, आधार कार्ड, डायरी (दुई थान) र रजिष्ट्ररहरु (७ थान) बरामद गरेको थियो । पक्राउ परेका सुरजितले सुन, चाँदी र नगद पैसाको कुनै पनि स्रोत खुलाउन नसकेको प्रहरीले जानकारी दिएको छ ।

प्रहरीले सुरजितलाई थप कारवाही र अनुसन्धानका लागि सक्कलै खानतलाशी वरामदी मुचुल्का, बरामद सुन, चाँदी, नगद, बरामद अन्य सामानसहित राजश्व अनुसन्धान विभाग, पुल्चोक ललितपुरमा पठाउने तयारी गरेको छ ।

‘हुण्डी कारोबारीमाथि पनि यस्तैं कारवाही होस्’ : पोखरेली जनता
पछिल्लो समय कास्की प्रहरीको बढ्दो सक्रियतासँगैं पोखरेलीहरुले अब हुण्डी कारोबारीहरुमाथि पनि कारवाही होला कि भन्ने आशा राखेका छन् । विभिन्न च्यानल मिलाएर पोखरामा बषौंदेखि सञ्चालन भईरहेको हुण्डी कारोबारीहरुलाई भने प्रहरीले आजसम्म कारवाही गरेको छैन ।

विश्वस्त प्रहरी स्रोतका अनुसार हुण्डी कारोबारीहरुले लाखौं रुपैयाँ प्रहरीका उच्च अधिकारीहरुलाई हरेक महिना बुझाउने हुँदा उनीहरु सुरक्षित रहँदैं आएका हुन् । तर यसपटक कास्की प्रहरीको पछिल्लो बढ्दो सक्रियता र काम हेर्दा हुण्डी कारोबारी पनि समातिने आशा जनताले गरेका छन् ।