पोखरा, २९ माघ । बिना लाईसेन्स स्कुल बस हाँकेर आफ्नै ३ वर्षीय विद्यार्थीको ज्यान लिने पोखरा–१८, सराङकोटमा रहेको बाल प्रतिभा बोर्डिङ स्कुलका प्राचार्य आत्मबहादुर थापा आज सोमबार पुर्पक्षका लागि कारागार चलान भएका छन् ।

जिल्ला अदालत कास्कीका न्यायाधीश रामचन्द्र शर्माको इजलासले सवारी ज्यान सम्बन्धि मुद्दामा प्राचार्य थापालाई पुर्पक्षका लागि कारागार चलानको आदेश दिएका हुन् । पीडितका तर्फबाट नवराज कार्कीले माघ २८ गते जिल्ला अदालतमा सवारी ज्यान सम्बन्धि मुद्दा दर्ता गरेका थिए ।

प्राचार्य थापाले चलाएको ग१क ४०८२ नम्बरको स्कुल बसले किचेर यहीं माघ ५ गते पोखरा–२४ स्थित कास्कीकोट काउलेमा ३ वर्षीय बालक समिर कार्कीको मृत्यु भएको थियो । सोही विद्यालयको नर्सरीमा पढ्दै गरेका समिर बसबाट झरेर घरतर्फ जाँदैं गर्दा शुक्रबार दिउँसो पौने ३ बजेतिर स्कुल बसले किचेको थियो ।

प्राचार्य थापा आफैंले बिना लाईसेन्स बस चलाएर विद्यार्थीको मृत्यु भएपछि उक्त घटनाबाट बच्नका लागि नक्कली ड्राईभर खडा गर्ने कोसिस गर्दागर्दै उनी असफल भएका थिए । त्यसो त प्राचार्य थापालाई प्रहरीकोबाट छुटाउन व्यापक राजनीतिक दवाव पनि दिइएको प्रहरीले स्रोतले बतायो ।

बसबाट झरेर घरतिर जाँदै गरेका समीरलाई सोही बसले नैं ठक्कर दिएको थियो । समीरलाई घाइते अवस्थामा तत्कालैं मेट्रोसिटी अस्पताल ल्याईए पनि डाक्टरले दिउँसो ४ बजेतिर मृत घोषणा गरेका थिए ।

प्राचार्य थापा पैसा बचाउने लोभमा गाडीमा न त चालक राख्थे, न त सहचालक :
स्थानीयका अनुसार चालक र सहचालककोे खर्च जोगाउन विद्यालयका प्राचार्य आफैंले नैं स्कुल बस चलाउँदैं आईरहेका थिए । कहिले काँही सहयोगीका रुपमा स्कुल बस चलाउँदा आफ्नै आफन्तको सहयोग लिने प्राचार्य थापाले पैसा जोगाउने चक्करमा एक ३ वर्षीय निर्दोष बालकको ज्यान लिन पुगेका थिए ।