पोखरा, १६ पुस । कास्की जिल्लाको माछापुच्छ्रे गाउँपालिकामा अवस्थित मर्दी हिमाल पदमार्गमा गएका एक विदेशी पर्यटक ३ दिनदेखि सम्पर्क विहिन भएका छन् । पदयात्राका क्रममा स्विडेनका नागरिक २० वर्षीय मिचल लिउ ब्लोम्बर्ग शनिबार बिहानदेखि सम्पर्कविहीन भएपछि खोजी सुरु गरिएको जिल्ला प्रहरी कार्यालय कास्कीले जानकारी दिएको छ ।

जिल्ला प्रहरी कार्यालय कास्कीका प्रवक्ता प्रहरी डीएसपी श्रवणकुमार विकले शनिबारदेखि वेपत्ता भएका स्वीडेन नागरिकको खोजी कार्य जारी भईरहेको र अझैसम्म पनि पत्ता लगाउन नसकिएको जानकारी दिए । प्रहरीका अनुसार उनी हाई क्याम्पबाट मर्दी आधार शिविरतर्फ जान शनिबार बिहान ४ बजे होटलबाट हिडेका थिए । एक्लै यात्रामा निस्किएका स्वीडेन नागरिक मिचलको खोजीमा ट्रेकिङ गाईड, स्थानीय जनता र नेपाल प्रहरीको टोली खटिई रहेको छ ।

माछापुच्छ्रे गाउँपालिका–८ का वडाध्यक्ष राम गुरुङले स्थानीय पर्यटन व्यवसायी तथा गाउँपालिकाबाट समेत बेपत्ता भएका पर्यटकको खोजी तथा उद्धारको काम भइरहेको जानकारी दिएका छन् । ‘स्थानीय पर्यटन व्यवसायी, ट्रेकिङ गाईड तथा गाउँपालिकाबाट शनिबारदेखि नै खोजी कार्य सुरु गरे पनि आजसम्म केही पनि भेट्टाउन सकिएको छैन,’ वडाध्यक्ष गुरुङले भने–‘स्थानीयका अनुसार मर्दीको भ्यूपोईन्ट पार गरेर बेसक्यामतर्फ गएको भन्नेछ, हामीले सम्भावित ठाउँहरुमा व्यापक खोजी गरिरहेका छौं ।’ यसबारे काठमाडौंस्थित स्विडेनको राजदूतावासमा पनि इमेलमार्फत जानकारी गराएको वडाध्यक्ष गुरूङले जानकारी दिएका छन् ।

पदमार्गको लो क्याम्पमा माछापुच्छ्रे गाउँपालिकाले स्थापना गरेको पर्यटक सूचना केन्द्रमा समेत गत शुक्रबार उनले आफ्नो नाम दर्ता गरेको भेटिएको छ ।